Kunabamemezela imisebenzi engekho
UMNYANGO wezeMpilo KwaZulu-Natal sewuxwayise umphakathi ngesikhangiso esiveza imisebenzi engekho esesisabalele ezinkundleni zokuxhumana.
Lesi sikhangiso sithembisa imisebenzi esibhedlela esisakhiwa ngasenxanxatheleni yezitolo eBridge City, iDkt Pixley Ka Isaka Seme Memorial.
Esitatimendeni esithunyelwe nguMnyango wezeMpilo kuvela ukuthi ayikho imisebenzi yakulesi sibhedlela ekhishwe yiwo. “Umnyango ufisa ukukucacisa ukuthi asikho isikhangiso osusikhiphile umema abantu ukuthi bafake amaCV abo ukuze baqashwe. Lesi sikhangiso sikhishwe abantu abenza ubugebengu abantshontshe imininingwane yomnyango okubalwa kuyo uphawu lomnyango nesithombe sikaNgqongqoshe wezeMpilo KwaZulu-Natal, uDkt Sibongiseni Dhlomo.”
Okunye abakubalulile ngalesi sikhangiso ukuthi kasisho ukuthi abantu bangazifaka kuphi izicelo zomsebenzi. Lo mnyango uveze ukuthi ngeke uze usifake isikhangiso esithi abantu abafake izicelo zomsebenzi kwi-internet. Uthi sekunezimemezelo eziteshini zomsakazo ezizocacisela abantu ngohlelo oluzolandelwa uma sekufunwa abantu abazosebenza kulesi sibhedlela.
Umnyango unxuse umphakathi ukuthi uxwaye ungabi abagilwa balabo abakhipha izikhangiso zombumbulu. Uthe uzozikhipha emaphephandabeni athembekile izikhangiso zemisebenzi yalesi sibhedlela.