Kusuke isidumo esikoleni
BASHISE imigqomo kadoti namathayi abafundi baseTemple Valley High eVerulam bethi abasamfuni uthishanhloko walesi sikole obajezisela ukuthi ‘bathandana’ nabashayeli bamatekisi.
Laba bafundi baqale ngoMsombuluko ukubhikisha esikoleni. Izolo uthishanhloko nabanye abaholi bomphakathi babe nomhlangano bedingida udaba lombhikisho walaba bafundi.
Okunye abafundi okuthiwa bakhala ngakho ukuthi uthishanhloko ubefuna imali yokufunda yanyakenye abayikweletayo.
UMnuz Prem Balram weReaction Unit South Africa (RUSA) uthe abanye abafundi besifazane abebeyingxenye yalo mbhikisho, bebethi bafuna ukuthi uthishanhloko ahambe ngoba wabajezisela ukuthi baya ‘ocansini’ nabashayeli bamatekisi.
UMnuz Kwazi Mthethwa woMnyango wezeMfundo KwaZulu-Natal, ephawula ngalo mbhikisho uthe: “Lo mfutho abafundi abanawo kumele ngabe bawufaka ezifundweni zabo bazilungiselela ukubhala izivivinyo zekota yokuqala. Akumele bagxambukele emsebenzini womnyango wokuqashwa kothisha noma wokuhlelwa kwendlela yokufunda. Uma kunezikhalo kumele balandele izindlela zomnyango ezifana nokubikela abahloli, abakwazi ukuzithathela isinqumo sokuthi baxosha uthishanhloko,” kusho yena.
Uqhube wathi bayazi ukuthi akubona bonke abafundi ababandakanyekayo kulo mbhikisho wathi abanye basemakilasini kodwa abakwazi ukufunda baphazanyiswa yilaba ababhikishayo.
“Uma ababhikishayo behluleka ukulandela imigomo yokukhala yomnyango, sizophoqeleka ukuthi sithathe isinyathelo esilandelayo. Izinsuku ezine ezilahlekele abafundi ngenxa yalo mbhikisho ngeke zisabuyiseleka,” kusho yena.
Ikhansela uMnuz Johnson Chetty lithe ziningi izinto abafundi abakhala ngazo, wathi basazohlangana nabo abafundi bengabaholi bomphakathi babone ukuthi bangalulungisa kanjani lolu daba.
UCol Thembeka Mbele uthe amaphoyisa asiqaphile isimo kulesi sikole kulandela ukuthi kube nezinsolo zokuthi abafundi bashisa imigqomo kadoti, bashaya amafasitela ngamatshe kodwa alikho icala abalivulile ngalokho.
“Abafundi basaqhubeka nokubhikisha ngaphandle kwesikole, sivule icala lokususa udlame emphakathini eliphenywa eVerulam,” kusho yena.