Mazisukunyelwe izinkinga kwezemfundo
YINTO ejwayelekile ukuthi njalo ekuqaleni konyaka kube nemibhikisho ezikhungweni zemfundo ephakeme njengoba kunezinto izitshudeni ezisuke zikhala ngazo, ikakhulukazi, nemali ekhishwa yisikhwama sikahulumeni esixhasa izitshudeni, iNSFAS.
Kwakunethemba ukuthi le mibhikisho izoncipha emva kokumenyezelwa kwemfundo yamahhala eminyakeni emibili edlule.
Yize isikhona imfundo yamahhala kodwa isaqhubeka imibhikisho yezitshudeni ngoba nokusebenza kukaNSFAS kusaqhubeka nokuba nobuhixihixi.
Enye inselelo ebhekene nezikhungo zemfundo ephakeme noNSFAS ukwanda kwesibalo sezitshudeni ezaphasa u-matric njengoba izikhala emanyuvesi nasemakolishi zizincane ukuthi kungamukelwa wonke umuntu.
Nakuleli sonto, iqhubekile le mibhikisho njengoba izitshudeni beziyigxoba kuwona wonke amanyuvesi KwaZulu-Natal kanjalo naseWits eGoli. Kodwa sibe muncu isimo eKZN njengoba umbhikisho waseDUT udlule umphefumulo kaMlungisi Madonsela obenza unyaka wesithathu ezifundweni zeBusiness Administration.
UMadonsela obeyilungu le-EFF Student Command udutshulwe onogada abebehlakaza izitshudeni ngoLwesibili ntambama. Kuthiwa udutshulwe emhlane kanti ushonele esibhedlela.
Ibuhlungu le nto eyenzekile futhi bekungafanele kufike lapho kuphuma khona isidumbu ngoba ngokomthetho ababhikishi kumele bahlakazwe ngezinhlamvu zenjoloba, hhayi ezangempela.
Izitshudeni uma zisephutheni siyazisola kodwa akusoze kwabakhona isizathu esamukelekile sokuthi zidutshulwe kuze kuphume isidumbu, kushabalale namaphupho omndeni njengoba lesi sitshudeni besesiphothula izifundo zaso.
Uphenyo lweDUT namaphoyisa kumele lusheshe lucacise ngezinyathelo ezizothathelwa onogada abathintekayo kulesi sigameko.
Okunye okudinga ukusukunyelwa, yizinkinga ezikhona ezikhungweni zemfundo ephakeme ngoba kuyacaca ukuthi izisombululo obekukholakala ukuthi zizosebenza azanele.
Minyaka yonke enye yezinjongo zikahulumeni ukunyusa isibalo sabafundi abaphasa u-matric kodwa izikhala emanyuvesi azanele futhi neNSFAS ngeke ikwazi ukuxhasa bonke.