Uzizwa ebusisekile ngokunikwa uhlelo alwethula kwiBET
SIVUMELANA kahle noNomalanga Shozi ukuthi ngizomshayela ucingo ngo-2 ntambama ukuze sibe nengxoxo. Hhawu ngimangazwa wukuthi uma sengimshayela ngo-2 uthi usematasa ucela ngibuye ngimthinte. Anginankinga ngoba kuzonginika isikhathi ukuze ngiqhubeke nokunye engikwenzayo.
Uma sengibuya ngishaya angisamtholi.
“Uyangibhayizisa-ke manje lo,” ngisho ngenhliziyo, “ngabe kungcono ukube uyasho ukuthi unenkinga.”
Lugcina luyaphela usuku akabuyeli kimi. NgoLwesithathu ekuseni ngiyamzama futhi bese ngiyamthola. Uyaxolisa uyachaza ukuthi wagcina ematasa wakhohlwa.
“Singakhuluma kodwa manje ngoba sengiqedile ukusebenza.”
Uqeda kuqopha uhlelo alwethulayo iBET Breaks, oludlala kwiBET (DStv channel 129), oluveza ezosaziwayo ezisematheni.
“Kusho lukhulu kimi ukuqokwa njengenxusa lesiteshi esikhulu kangakanga. IBET Breaks wuhlelo lwami futhi nezinto engizishoyo ngizicabanga mina abangitsheli. Ukuba kwiBET yinto enkulu ngoba ngibonakala ngisho nakwamanye amazwe e-Afrika. Ngijabule nje, uMdali ungibusisile, ngisazohambela nemicimbi emikhulu phesheya kwezilwandle.”
UNomalanga (24) uzalelwe eBhobhoyi, ePort Shepstone. Bahlanu kubo futhi abazali bakhe basaphila bobabili.
“Ngikhulele emakhaya hhayi elokishini. Ngikhule njengazo zonke izingane, ngithanda ukudlala phandle ngingazigqokile izicathulo. Namanje angikuthandi ukugqoka izicathulo. Ekhaya bekugcwele izimbuzi, izinkomo nezinja ngoba ubaba wayezingela.”
Uyise wayengasebenzi kungunina osebenzayo enguthisha.
“Sasingaswele lutho ngoba sasikuthola esikudingayo ngaphandle kwezinto ezifana neDStv esize saba nayo ngo-2008.”
Ngesikhathi eqeda u-matric eMarburgh Secondary ngo-2012 wayezitshela ukuthi uzoba wummeli kodwa wabuye wangena kwezokungcebeleka ngemuva kokuthola ithuba lokusakaza kuGu Community Radio.
“Esikoleni ngangibona ukuthi isiNgisi ngiyasishaya futhi ngangiseqenjini lezingxoxompikiswano. Umama wayejabule ngokuthi ngizoba wummeli kodwa ngabuye ngayeka ngenxa yothando lokusakaza.” Uthando lwakhe lwezokusakaza lumholele kwiGagasi FM ahlukane nalo ngasekuqaleni konyaka odlule ngemuva kokunqanyulwa kwenkontileka yakhe. Uthe uyawukhumbula umsakazo futhi usemizameni yokuthi abuyele kuwo kungekudala. “Ngiyayithanda nethelevishini kodwa umsakazo ngiwuthanda kakhulu ngoba ngisuke ngiyimi futhi ngikhuluma ngqo nabantu.” Le ntokazi eteketiswa ngoThe Flame, ithe umsebenzi wayo yiwo ewunake kakhulu ukwedlula yonke into.
“Iziqephu zami zeRhythm City ziyavela manje, ngenxa yemikhankaso yeLux, iPonds neVaseline. Ngimatasa. Nginenhlanhla yokuthi abafana bayangisaba abangihluphi. Ngizoba nosuku lwezithandani oluthule njengonyaka odlule. Angibheki futhi ngigxile emsebenini ngoba uNkulunkulu unginike ithuba.”
Uthe kuningi asafuna ukukuzuza njengokwenza inkece, ukuba nemisiko yakhe yengqephu, izimpahla zangaphansi zabesifazane nezinwele. Ufuna nokulingisa emafilimini amakhulu.
Enye yamafilimu akuwo, iLove Lives Here eyaqoshwa eThekwini, iyaphuma ngenyanga ezayo.
UNomalanga, ozifela ngokudla uphuthu, imifino namadumbe, ukhonze ukuzihlalela nomngani wakhe ongumsakazi weGagasi FM uZola Zeelovin. Uthe umthanda ngoba bayesekana kukho konke abakwenzayo futhi bafiselana impumelelo.
Kusasa uthe uzobe ebheke ukubona ukuthi iyozala nkomoni phakathi kwe-Orlando Pirates neKaizer Chiefs eFNB Stadium.
“Ngiyaweseka womabili la maqembu kodwa ngithanda iKaizer Chiefs kancane. Angazi noma uthando lusafana yini uma ubheka indlela eyenza ngayo kulezi zinsuku.”