UMjosty ufuna amavukana kwifilimu yakhe yodumo
UMDIDIYELI omkhulu wefilimu yamahlaya iKwaito uthe abantu abanamava kwezokulingisa bangazikhathazi ngokuza kwinhlokhono yokufuna abalingisi ngoba ufuna amavukana.
UPastor Mjosty uthe ufuna ukunikeza ithuba abantu abangakaze balingisa phambilini.
“Ngiyathanda ukuveza ithalente elisha. Baningi abantu abanganikezwa amathuba, ngakho mina ngiyalekelela ekutheni bawathole,” kusho uMjosty.
Ufanise ifilimu yakhe njengesikhungo sokuqeqesha abalingisi abasakhula bese eyabadedela ukuthi baqhubeke neminye imisebenzi.
“Abantu abake balingisa phambilini bangazihluphi nhlobo. Ngasebenza noThandeka Zulu we-Afro Soul wakhula waya kuZalo, uBrinzo Mhlongo wayejwayele imidlalo yeshashalazi, oThah Simelane, Simphiwe Shembe, Dlungelwa noHlonti baphuma kimi. Yilokho okungichaza kakhulu ukuthi nginikeza abantu amathuba,” kuchaza uMjosty.
Uthe ngoFebhuwari 22 uzoba nenhlolokhono eBat Centre, eThekwini. Izoqala ngo-9 kuya ku-3 ntambama.
“Ngifuna abantu abaneminyaka ephakathi kuka-10 no-60 abakwazi ukukhuluma IsiZulu phaqa ngoba ifilimu eyesiZulu,” kuqhuba uMjosty.
Uthe le filimu, okuzoba ngeyesine, izobe igabe ngamahlaya kusukela iqala ize iyophela. Ididiyelwe nguHappiness Mpase njengoba yena engumdidiyeli omkhulu.
“Mina ngiqhamuka nombono bese ngiqasha abantu abazongisiza ngenxa yokuthi ngimatasa nokunye. UHappiness nguye ozobe esingethe inhlolokhono futhi ijaji kuzoba nguThobani Nzuza onguMndeni kwi-eHostela.”
Le filimu bese kusanesikhathi yagcina ukuphuma ngoba eyokugcina yenziwa ngo-2013.
“Umphakathi ubukhala ngayo uthi angiyeke ukuba matasa ngezinye izinto ngibuyele entweni ongazi ngayo.”
Upthe ngePhasika uzokhipha i-albhamu yamahlaya ayenze noMfundisi uNtshebe.