‘U
MA ubona imoto inombhalo othize kwiwindscreen ngaphambili, ubokwazi leyo moto isuke idlulisa udaba oluthile kubantu abathile”.
Lawa mazwi akhishwe uMnuz Caleb Lwandle ohamba nge-ISUZU KB 250 DTEQ ka-2017 enombhalo othi “isinamuva”.
UTHOKOZANI MBUNDA uxoxe naye lo somabhizinisi waseFolweni onenkampani iLwandle Tents eqashisha amatende, cold rooms nezindlu zangasese ezingomahambanendlwane, wase ethwebula nezithombe.
THOKOZANI MBUNDA (TM): Lezi zimoto sike sizibone zikhangiswa kwithelevishini, ziqwala izintaba futhi zindonsa nemithwalo enzima, ngabe wawuqondeni ngokuthenga yona?
CALEB LWANDLE (CL): Ngangifuna imoto engizongcebeleka ngayo ibuye futhi ibe usizo olukhulu emsebenzini wami ngase ngibona lena ingifanele.
TM: Ngabe ikusiza kanjani emsebenzini wakho?
CL: Ngidonsa ngayo izindlu zangasese ezingomahambanendlwane nama-cold rooms uma kukhona la engiyobolekisa khona ngakho.
TM: Kungani ingenalo igama le nkampani yakho ngoba usebenza ngayo kodwa sibona ibhalwe isinamuva?
CL: Empeleni zikhona ezenkampani ezinombhalo wayo, lena iqondene nami kodwa ike isize uma kunohambo olude nolunomsebenzi omningi bese iyalekelela ngoba inamandla futhi iphakeme.
Okombhalo, umyalezo ongiwudlulisa emphakathini wangakithi ochaza ukuthi sekuyisikhathi sami sokuphumelela nokubukwa manje ngoba nami kade ngangishayela abanye izandla, ngisahlupheka.
TM: Ngikuzwe ngenhla uthi le moto ithatha amabanga amade, ngabe iliphi elide osulithathile ngayo?
CL: Ngisasuke eFolweni ngaya eHarding ngithwele itende ngidonsa nenqola.
TM: Ngabe ikuphatha kanjani emgwaqweni ovulelekile uma uthatha ibanga elide?
CL: Ayive iwubukhosi ngoba ngivele ngiyigcwalise ngoR1 200 kadizili bese ngihamba ngingajahi emgwaqweni, ngiqikelele nesivinini esibaluliwe kulowo mgwaqo.
TM: kuphi?
CL: Sigcina ku-220km/h kodwa angikaze ngisishaye sonke ngoba sengimdala, ngisafuna ukubona nabazukulu bami bekhula. Isivinini sayo sigcina
TM: Ngokwakho, lolu hlobo lwemoto lufanele abantu abanjani?
CL: Ngike ngiyibone iyinhle uma ihamba obaba abanomkhaba njengami ngoba uma ngiyiboleke umfana wami kusheshe kucace nje ukuthi akuyona eyakhe.
TM: I-service yayo usuyakwazi ukuzenzela?
CL: Angikaze ngizenzele, ngisavame njalo ukuyiyisa kubo kwayo uma kuyisikhathi se-service. TM: Yiziphi izinto efika nazo? CL: Kukhona iDiff lock, Air-conditioner, cruise control, ixhumana ne-cell phone, indawo yokuphatha izinkomishi, indawo yokuphumuza ingalo, umsakazo okhandelwe ngaphakathi, amawindi kagesi, amalambu enkungu, roller bar, tow bar, noseyili wangemuva okhoselisa izimpahla ezilayishwe ngemuva.
Uma nawe uthanda ukuvela kule ngosi neyakho imoto ungaxhumana noThokozani Mbunda ku-076 343 2216