Liyadlisa leli bhasi lakwaBenz

ELOKISHINI izimoto ezimise okwetekisi baziteketisa ngamagama ehlukene. Kukhona abazibiza ngegama elidumile bethi “yibhasi” kwesinye isikhathi bajobelele ngokuthi “elomjolo”, abanye bathi “yinkomo”, futhi akhona namanye.

Elinye lamabhasi adumile yiV-Class yakwaMercedes-Benz. Lokhu kufakazelwa nawukuthi kusukela yethulwa ngo-2014, sekudayise angaphezulu kuka209 000 emhlabeni jikelele futhi ngonyaka odlule kudayise angu-64 000.

AbebeseThekwini ngenyanga eyedlule ngesikhathi i-ANC igubha iminyaka engu-107, bazongifakazela ukuthi kwakuphithizela wona ezitaladini zaleli dolobha.

Lokhu kuthandwa kwale moto kwenza kungathusi ukubona abakwaMercedes bezama ukuyithuthukisa ngoba phela bafuna ukuthi iqhubeke nokuheha abanye abathengi.

Ngaphandle, izinto abazishintshile zihlanganisa ubhampa. Kusekhona izinhlobo ze-AVANTGARDE ne-EXCLUSIVE bese kuba khona ne-AMG-Line ene-radiator grille entsha egqizwe nge-chrome.

Kuphinde kube khona nemibala emisha kanjalo namarimu amasha amane. Ahlanganisa ayi-5-twin-spoke 17-inch light alloy wheels, angu-18 inch kanjalo nangu-19 inch 10-spoke.

Ngaphakathi lukhona ushintsho abalwenzile njengoba inama-air vents amasha.

Kuphinde kwasetshenziswa nesikhumba esisha ngaphakathi. Abagibeli bangemuva bahlala ngokukhululeka.

Kunezihlalo okwazi ukuzifaka ezizishaya njengeS-Class ezilalayo futhi zikuwotawote.

Ushintsho baphinde balwenza nangaphansi kwebhonethi. Kukhona injini kadizili i-V250 d enamandla engu-140 kW ne-torque engu-440 Nm.

Enye yiV 300 d enamandla angu-176 kW netorque engu-500 Nm. Uma unyathela iyakwazi ukwengeza i-torque engu-30 Nm futhi kuyithatha imizuzwana engu-7.9 ukufika ku-100km/h.

Bathi ihamba kamnandi emgwaqweni ngoba ithule futhi ayingqangqazeli.

Uma uthanda uyakwazi ukuthola u-gearbox oyi-9GTRONIC automatic transmission okokuqala ngqa.

Lo gearbox ungena esikhaleni se-7G-TRONIC.

Zonke zidonsa ngamasondo angemuva kanti uma uthanda uyakwazi ukuthola edonsa ngawo wonke eyi-4MATIC.

Ezokuphepha zihlanganisa iCrosswind Assist eyenza ukuthi ibe semzileni noma kuvunguza umoya onamandla. Kukhona futhi ne-Attention Assist. Okunye yi-Active Brake Assist eyenza ukuthi ibone ingozi bese ikhipha isixwayiso kuqala.

Uma umshayeli ezama ukugwema ingozi iyakwazi ukwengeza amandla amabhreki.

Le moto kulindeleke ukuthi itheleke eNingizimu Afrika ngekota yesithathu yonyaka.