Amasu ahlukene angasiza abashayeli
NJENGOBA kusanda kuqala unyaka futhi namanyuvesi esanda kuvula, isibalo sezimoto emgwaqweni sandile.
Lokhu kuhambisana nezingqinamba eziningi kubona bonke abashayeli. Umphathi weMasterDrive, u-Eugene Herbert, ukhiphe nanka amathiphu angasiza abashayeli babhekane nalesi simo.
Uma uhamba ngendlela ehlukile uya emsebenzini omusha:
- Esiminyaminyeni yenza isiqiniseko sokuthi ushiya isikhala esanele phakathi kwakho nemoto oyilandelayo.
- Gwema ukubuka iselula yakho ngoba nakhu uhamba kancane, udinga ukuhlale wazi ukuthi kwenzakalani kulona lonke uhambo lwakho.
- Uma ubona abantu beshayela budedengu, banikeze isikhala esithe xaxa futhi uzame ukusuka eduze kwabo uma kwenzeka.
- Uma uhluleka ukubekezelela isiminyaminya, thola into ezokusiza njengokudlala umculo ozokwehlisa umoya.
- Zama ukwehlisa umoya noma ngabe noma ngabe abanye abashayeli bashayela ngokungakucabangeli.
- Lalela imibiko ngesimo somgwaqo futhi ugweme izindlela ezinezinkinga.
- Zama ezinye izindlela ezingenaso isiminyaminya.
- Ungabafaki ngaphansi kwengcindezi abashayeli abathukile.
- Uma kukhona abanye abahlala endaweni ohlala kuyo, zama ukuthi nisebenzise imoto eyodwa khona uzophumula ukushayela mihla namalanga wonge nakuphethroli. Bheka kuqala ukuthi umshwalense uyakukhokhela yini kulokhu. Uma uya ngasesikoleni: - Ungagijimi noma ngabe kunjani. IMasterDrive iphakamisa ukuthi ungahambi ngesivinini esingaphezulu kuka-30 km/h eduze nezikole.
- Gada izingane ezingase zingene emgwaqweni. Lokhu kuhlanganisa nokubheka izimoto lapho kwehla khona izingane kolunye uhlangothi lapho ingane ingase iwele khona umgwaqo.
- Yima uma kuqhamuka amabhasi nezinye izimoto zokuthutha izingane
- Gwema ukudlula ezinye izimoto kodwa uma kwenzeka udlula, yenza isiqiniseko sokuthi unesikhathi nesikhala esanele ukwenza lokho.
- Bheka umuntu olawula ukuhamba kwezimoto nezingane futhi ulalele imiyalelo yakhe.
- Fundisa izingane zakho ukungagijimeli ezimotweni nokuthi uwelwa kanjani umgwaqo ngendlela ephephile. Uma ushayela ngesikhathi sesiminyaminya okokuqala:
- Yehlisa umoya: shintsha umzila kusenesikhathi ukuze ugweme ukushintsha ngomzuzu wokugcina.
- Zinikeze isikhathi esanele ukuze uzofika lapho uya khona ungasheshi.
- Hamba kuqala ukuze uzozijwayeza umzila ngaphambi kokuhamba kuwo uma sekunesiminyaminya.
- Ungayisebenzisi iselula ushayela. Kulabo abahamba ngezimoto zokuthutha umphakathi:
- Gwema ungena emotweni ebukeka ingekho sesimeni.
- Uma umshayeli wakho ebudedengu, kungcono ukwehla endaweni lapho kuphephe khona bese ulinda enye imoto.
- Uma uhamba ngezinyawo, gqoka imibala okulula ukuthi abashayeli bakubone.