Kwehlile ukuthengwa kwezimoto

UVULWE kabi unyaka embonini yezimoto kwehla isibalo sokuthengwa kwezintsha ngoJanuwari.

Lokhu kuvezwe yiNational Association of Automobile Manufacturers of South Africa (NAAMSA) ngesikhathi iphawula ngokuthengwa kwezimoto ngenyanga eyedlule.

Ithe izibalo zibe phansi kunendlela ebilindelekile.

Izimoto ezidayisiwe zibe wu-42 374 isibalo esehle ngo-3 398 noma u-7.4% uma kuqhathaniswa no-45 772 owadayiswa ngoJanuwari wonyaka odlule.

Isibalo sezimoto ezidayise ngaphandle sona sikhuphuke ngo-4 160 noma u-29.4%. Sibe ngu-18 289 kanti ngesikhathi esifanayo ngonyaka odlule zazingu-14 129.

Kuzona zonke izimoto eziwu-42 374 ezidayisiwe ezilinganiselwa ku-33 633 noma u-79.4% zithengwe emagaraji, ezilinganiselwa ku-14.3% zithengwe yizinkampani eziqashisa ngezimoto, eziwu3.5% zaya kuhulumeni kwathi u-2.8% kwaba ngowezinkampani.

Isibalo sezimoto ezincane ezintsha sehle ngo-3 512. Zibe wu-29 040 zisuka ku-32 552 ngoJanuwari wonyaka odlule.

Ezimotweni ezingamaveni namakhumbi amancane kuthengwe eziwu-11 681. Lokhu kusho ukuthi awukho umehluko otheni ngoba ngesikhathi esifanayo ngonyaka odlule zaziwu-11 679.

INaamsa ithe izibalo zezimoto ezithunyelwa ngaphandle zinhle uma kubhekwa ukuthi enye yezinkampani iqale unyaka isiyophela ngenxa yokuthi ibisalungisa imboni.

Ithe isibalo ilindele ukuthi sinyuke futhi ibheke ukuthi sifinyelele ku-385 000 ekupheleni konyaka. Ngonyaka odlule zaziwu-351 139.

Ithe ukunyuka kwenzalo yemalimboleko kube nomthelela ekuthengweni kwezimoto ezintsha. Ithe izinkampani eziningi akukho okutheni ezikulindele ngaphambi kokhetho lukahulumeni kazwelonke kodwa kulindeleke ukuthi ukuthengwa kuthuthuke kusuka maphakathi nonyaka.

Ezinye zezimoto ezithengwe kakhulu yilezi: Toyota Hilux - 2 794 VW Polo - 2 512 VW Polo Vivo - 2 461 Toyota Corolla/ Auris/Quest - 2 202 Ford Ranger - 2 194 Nissan NP 200 - 1 483 Toyota Quntum - 1 281 Toyota Fortuner - 1 000

Hyundai Grand i10 - 867

Isuzu D-MAX - 821