Kugqame izinselelo kwaba nokushodayo kwekaRamaphosa
ICOSATU KwaZuluNatal ithatha umbiko kaMengameli Cyril Ramaphosa njengombiko ocwaningwe kahle futhi uziveza obala izinselelo ezibhekene nezwe.
Kodwa kuyakhalisa kakhulu ukuthi uMengameli enkulumeni yakhe uhlulekile wukuveza izindlela ezicacile neziqavile zokushintsha umnotho osaphethwe ngenqubo yobandlululo ezweni.
Kuyajabulisa ukuthi uRamaphosa akabanga namalimi kwazibophezele kukho okungukulwa nenkohlakalo okuhlanganisa nokwebiwa kwemali kahulumeni. Lokhu kubalulekile kakhulu ukuze imali yezwe isize ekuletheni ushintsho empilweni yabasebenzi nasebantwini abantulayo.
I-Cosatu esifundazweni ibona kubalulekile nokubhekisiswa kwenkohlakalo eyenzeka nesezinkampanini ezizimele.
UMengameli ugcizelele kakhulu isidingo sokukhuliswa komnotho nokwakhiwa kwemisebenzi.
Lokhu kubaluleke kakhulu njengoba imisebenzi iphela kakhulu ezweni. Abantu abaningi bayahlupheka futhi kuyanda nokungalingani kwezomnotho.
Kulokhu ukugcizelele kakhulu ukufezwa kwezinqumo zengqungquthela eyadingida ngokwakhiwa kwemisebenzi i-Job Summit. Okuyingqinamba enkulu wukuthi akavezanga izinyathelo ezizothathwa ukwenza isiqiniseko sokuthi lokhu kuyenzeka nokuthi zizokwenziwani izinhlaka ezingazibophezeli ngokugcwele kwiNedlac.
Kumele kodwa kuthokozelwe ukugcizelela ukuthuthukiswa komnotho wangaphakathi nokugqugquzela osomabhizinisi ukuthi baqhubeke nokusimamisa umnotho wangaphakathi. Ukusayinwa komthetho wezokuncintisana, iCompetition Amendment Act, kuyasithokozisa siyiCosatu. Lokhu kuzosiza kwakhiwe imisebenzi.
UMengameli ukhulume kakhulu ngendaba yezinkampani zikahulumeni wathi amabhodi angamela lezi zinkampani kumele abe nabantu abaqotho nabanamakhono. Kodwa siyathanda ukuzwa ikakhulu ngendima okumele iklanywe yilezi zinkampani ekwakhiweni kwemisebenzi, nokuthi izikhulu ezingaziphathi kahle zizothathelwa ziphi izinyathelo.
Kuyahlukumeza ukungaphumeli obala ngokucacile kukaMengameli ngendaba ye-Eskom. Kumele sizwe ukuthi bazovikelwa kanjani abasebenzi ekudilizweni nokuthi luzomiswa kanjani uhlelo lokunikezela i-Eskom ezinkampanini ezizimele ama-Independent Power Producers (IPP). Isiphakamiso sokuhlukanisa i-Eskom kathathu sibukeka singenye yezindlela zokunikezela i-Eskom ezinkampanini ezizimele.
Imisebenzi iyaqhubeka nokulahleka ezimayini yize noma uMengameli ekubekile ukuthi kuningi okwenziwayo ukulungisa isimo sokuphathwa kwezimayini. Bekumele kumiswe ngokucacile ukudilizwa kwabasebenzi.
Besilindele ukuzwa ngokuqedwa kwamaLabour Brokers, ukuqedwa kokudayiswa kwemisebenzi kahulumeni kuhlanganisa nokuvikeleka kwabasebenzi bakahulumeni ekudilizweni nokuvalwa kwezikhala zemisebenzi kuhulumeni.
Kuningi okunye uMengameli akubekile okuhle okubalwa kukho ukulwa nobugebengu kuhlanganisa nokulungisa izinselelo ezibhekene nophiko lwezobunhloli.
Kubaluleke kakhulu nokulungisa ukungalingani, izinselelo kwezemfundo, ukuphuthunyiswa kohlelo lomshwalense wezempilo onesithunzi, iNational Health Insurance (NHI).
Njengabasebenzi kuyasiphazamisa ukungafezwa kwezidingo yilabo abaphethe iminyango nabaqhoqhobele izintambo zoMbuso, ukulawulwa kwezwe lakithi ngokombuso wamadlagusha nobungxiwankulu.
Ngenxa yalezi zinto esizibalile iCosatu imema bonke abantu ukuba baphume ngobuningi babo uma sesiphuma umkhankaso wokulwa nokushoda kwemisebenzi nokudilizwa kwabasebenzi ngomhla ka-13 Febhuwari. Ngalolo suku izinyunyana zithi alubhadwa emsebenzini.
UMkhize ungunobhala weCosatu KwaZulu-Natal.