URamaphosa ubongele iSGC
UMENGAMELI Cyril Ramaphosa ubongele iSoweto Gospel Choir (SGC) ngokubuye nendondo yesithathu kumaGrammy Awards.
Umcimbi, obesekungoka-61 nothathwa njengomunye wemikhulu emhlabeni, ubuseStaples Center, eLos Angeles, ngeSonto ebusuku.
Bekuhlonishwa amaciko ahlukene emhlabeni ngegalelo lawo kwezobumnandi.
Besekungokwesihlanu iSGC iqokwa. Indondo yangeSonto, eyithole nge-albhamu ethi Freedom, bese kungeyesithathu.
Indondo yamukelwe amalungu eSGC obekukhona kuwo uDiniloxolo Ndlakuse, Shimmy Jiyane, Mary Mulovhedzi noMulalo Mulovhedzi.
URamaphosa uthe iNingizimu Afrika kumele iyibonge iSGC ngokuxoxa izindaba ezehlukene zezwe nokuqhubeka nokuliqhakambisa.
“Siyayibongela iSoweto Gospel Choir ngokuthola indondo. Lena indondo yayo yesithathu, siyayibongela kakhulu.”
Abanye abayibongele wumholi weDA, uMnuz Mmusi Maimane, Herman Mashaba, uSolwazi Thuli Madonsela, iNkatha ne-EFF, Thembisa Mdoda nabanye.
I-SGC seyike yahlabana ngeEMMY.
ILadysmith Black Mambazo ihlababe ngendondo efanayo ngonyaka odlule. Ibisithola indondo yesihlanu.
UChildish Gambino ugile izimanga ehamba nezindondo ezibalulekile ngengoma yakhe America.
UChildish uthole indondo yeRecord of the Year, neSong of the Year. UCardi B ube ngumrepha wokuqala wesifazane ukunqoba indondo ye-albhamu yomculo we-rap ehamba phambili.
Intokazi ebiphethe uhlelo, u-Alicia Keys, ijabulise abaningi ishaya ophiyano ababili ngesikhathi icula izingoma zayo ezehlukene. I-SGC ike yathokozisa abathandi bobumnandi ngesikhathi icula noBeyonce kwiGlobal Citizen e-FNB. This is