UZikalala namagama angehlanga kahle kwi-ANCYL eKZN

USIHLALO we-ANC KwaZulu-Natal, uMnuz Sihle Zikalala, ukhwele wadilika kwi-ANCYL wathi kumele ivuke emaqandeni ukugwema ukuthi ingaphelelwa wushatini.

Ekhuluma kwiLekgotla ye-ANC KwaZulu-Natal yezinsuku ezimbili, esongwe izolo eCoastlands Hotel eThekwini, uZikalala uxwayise ngokuthi i-ANCYL isengcupheni yokuphelelwa yisithunzi uma ihlulwa ukuxazulula izinkinga zentsha.

“I-ANC ayikwazi ukuthatha umsebenzi wokwakha nokuvukuza intsha kube kukhona iYouth League, akumele ngabe kukhona izinkinga ezikhungweni zemfundo ephakeme kube kukhona i-ANCYL, abantu abasha balwela izimfuno zabo, uphiko lwentsha alukwazi ukuhola abantu elingabamele,” kusho uZikalala.

Okhulumela i-ANCYL kuzwelonke, uMnuz Mlondi Mkhize, uthe yize bemhlonipha uZikalala kodwa abakuthandi ukuthi abaholi babahlasele ngezinto ezingabambeki.

“Asinankinga uma abaholi benza izitatimende ngathi inqobo uma bekhuluma iqiniso. Into esingahambisani nayo ukuthi umuntu asihlasele ngento engekho,” kusho uMkhize.

Uthe akusilo iqiniso ukuthi i-ANCYL iyahluleka ukuxazulula izinkinga zentsha.

“KwaZulu-Natal, lapho uZikalala enguSihlalo we-ANC, ziningi izinto esezizuzwe yintsha ngenxa yobuholi be-ANCYL esifundazweni,” kusho uMkhize.

Uthe uZikalala bekumele athole amaqiniso kuqala ngaphambi kokuthi abahlasele.

“Akusilo futhi iqiniso ukuthi i-ANCYL iyahluleka ukuxazulula izinkinga ezikhungweni zemfundo ephakeme ngoba iyona ebisekhaleni lomkhankaso weFees Must Fall isebenzisana nezinhlaka ezifana noSasco,” kusho uMkhize.

Uthe ukuphatha kwe-EFF Student Command kwezinye izikhungo zemfundo ephakeme akusho ukuthi abafundi abasayizwa indaba yezinhlaka zabo kodwa kudalwe yimibango yezikhundla.