Kuwubudedengu okwenziwe wuRamaphosa ePhalamende
Mthokozisi Shangase ETRUSTFEED Mfan’fikile Sibisi ENGONYAMENI MHLELI: Ngidangele ngesenzo sikaMengameli Cyril Ramaphosa (osesithombeni) ngesikhathi ethula inkulumo yakhe kuvulwa iPhalamende mhla ka-8 Febhuwari.
Ngenkathi ethi sineqhaza okumele silibambe siqu sethu njengabantu baseNingizimu Afrika ubabale bonke abaholi abamnyama nabamhlophe emaqenjini aphikisayo washiya elikamengameli weNkatha inkosi uMangosuthu Buthelezi.
Asikho isizathu ebesingamenza ukuba alilibale igama lakhe ngoba ngesikhathi ebheka uMnuz Julius Malema, uShenge ubehleli eduze kwakhe. Kumangazile lokhu kodwa kuwubudedengu obukhulu nesingakulindele kuye njengenhloko yoMbuso.
Nguye kuphela owaziyo ukuthi kungani enze lokhu. Nokho ngiyafisa ukumkhumbuza ukuthi akukaze kubekhona ukubuyisana phakathi kukaKhongolose ngeNkatha. Uma enza kanjena uxebula amakhekheba ezilonda namanxeba asabhibha.
Sonke siyazi ukuthi umlando ubhalwe yilabo abanqobile empini ukuze phela ubavune. Noma angenzani uRamaphosa kodwa akasoze aphumelele ukucima umlando kaShenge ekulweleni inkululeko nomnikelo wakhe ePhalamende.
Umnikelo wakhe awusoze walinganiswa ngokuthi akakaze abe ngumengameli wezwe. Uma kwakunjalo uMadiba noMnuz Thabo Mbeki babengeke bamqoke ukuba abe yibamba likamengameli wezwe izikhathi ezingu-22.
Kungani bamqoka bekhona osondonzima nezigomagoma zombusazwe kuKhongolose? Kungani uMadiba azisholo yena la mazwi engizowacaphuna wangafunzwa muntu emini izigodi zibukwa? “Sisebenzise lonke uhlobo lwesikhali ukuqeda ngaye kepha sehlulekile. Usekhona. Uyinsimbi engagobi. Asikwazi ukuba simzibe.”
Kungani uMengameli Ramaphosa ezama ukwenza okwahlula izingqwele zakhe? Sonwabile Xasa