I-Bucs ilahle amaphuzu kwi-Esperance
IZITHWESE umthwalo i-Orlando Pirates ilahla amaphuzu amathathu emdlalweni weCAF Champions idliwa yi-Esperance of Tunis ngo 2-0 emdlalweni kaGroup B eStade El Menzah, eTunisia, izolo ntambama.
Amagoli abulale iPirates angene ngokwehlukana kweziwombe, elokuqala lishaywa u-Anice Badri, elesibili langena umdlalo usoyophela ngoka-90 ngonyawo likaHaythem Jouini.
Lo phumela usho ukuqhwakela kwe-Esperance eqoqweni ngamaphuzu ayisishiyagalombili ekubeni umdlalo uqale womabili amaqembu elingana ngamaphuzu amahlanu.
Ezimnyama sekumele ziqinisekise ukuthi ziyanqoba kuyo yonke imidlalo yazo emibili esele kuGroup B ukuze zikwazi ukungena kumaquarterfinal eChampions League.
Zizodlala nePlatinum FC yaseZimbabwe, e-Orlando ngoMashi 3.Umzuliswano wokuqala walo mdlalo ekuhambeni waphela ngo 0-0. NgoMashi 16 zizovakashela iHoroya eGuinea ezayishaya ngo 3-0. Umdlalo wazo wokuqala ne-Esperance eSoweto waphela ngo 0-0.
IPirates izitha ziyithelekele zibekwa kwisiwombe sokuqala.
Lokhu kwenze unozinti weZimnyama, uWayne Sandilands wamatasatasa, kwezinye izikhawu zasinda sekuvalwe amehlo.
Ngemuva kwemizuzu ewu-16 i-Esperance iwutholile umvuzo wokuhlasela kwayo ngegoli likaBadri.
Lapha udonga lweBucs lukhombise ubudedengu kade kushaywa i-free kick. UYoucef Belaili umane walishaya laphuma eceleni kodonga ibhola lafike ebhokisini ezitanasela uBadri, walinamathisela enethini esebhekene noSandilands.
Kuyona le minyakazo kukhona lapho lo nozinti esindiswe uzakwabo u-Asavela Mbekile, selimeqile ibhola ngemuva kwesidididi ebhokisini lePirates, ihluleka wukususa umhlola ekhaya. Ezikhathini ezimbalwa esiwombeni sokuqala lapho iPirates isingasebhokisini le-Espeance, ayizange ikhombise ubungozi. Kubuywa ekhefini ibhentshi lePirates lidonse uPaseka Mako kwafakwa uThamsanqa Gabuza. I-Esperance iqhubeke lapho ibigcine khona, uSandilands elikhou ephunge amabhola ayingozi abethunyelwa kuyena. Ezimnyama zifake uJustin Shonga endaweni kaLinda Mntambo. Emizuzwini engemingaki uShonga ucishe wathola elokulinganisa kodwa ibhola lakhe laphuma eceleni ebelingagcwalanga kahle onyaweni.
Ngemuva kwezikhawu eziningi uSandilands enza umsebenzi oncomekayo emapalini kubuye kwavuka okumqhatha nabalandeli bePirates, ephuma emapalini kungenasidingo wathi ‘dankie’ uJouini walibeka enethini, waphela umdlalo.