Ubengundabamlonyeni ‘umbuthano’ wamadoda’
IPHENDUKE undabuzekwayo ezinkundleni zokuxhumana yaze yavala isasasa losuku lwezithandani ‘inkomfa yamadoda’ ebizwa ngokuthi, i-men’s conference.
Le ‘ngqungquthela’ ebingekho nebekweyokuzakhela bekuhlelwe ukuthi iqale ngoLwesithathu ize ivalwe kusasa ngoMgqibelo. Le ‘ngqunguqthela’ ubungafunga ukuthi into yangempela njengoba ithathe abantu abaningi ngisho osaziwayo, osopolitiki, osomabhizinisi ngisho nabantu bamazwe angomakhelwane.
Ezinkundleni zokuxhumana bekubhuza izithombe ezihlelwe ngamazinga ahlukene abantu, izifundazwe namadolobha kanjalo nemikhakha yemisebenzi abayenzayo.
Obekuhlaba umxhwele nobekwenze yaba nesasas ukuthi beyilokhu iyimfihlo indawo ezobanjelwa kuyo.
Lokhu kwenze wonke umuntu wafuna ukwazi ukuthi iyiphi le ndawo. Okushiye abantu bengawuvali umlomo uhlu lwabantu abakhishwe ngezikhundla ezahlukene kuwo okubalwa nobengumengameli waseNingizimu Afrika okuthiwa uzokhuluma ngesithembu.
Usomahlaya uMondli Mzizi negama lakhe like lavela njengomphathi wohlelo, izitabane nazo bezikhona kulolu luhlu lwezikhulumi eziqavile kulo mcimbi.
Izithombe ezisabalale ezinkundleni zokuxhumana bezixoxa indaba ngohlobo lwamadoda atholakala ezifundazweni ezahlukene nohlobo lwemisiko nezitayela azigqokayo. Isifundazwe saKwaZulu-Natal besimelwe amabhinca amabhulukwe o-brentwood, iGoli limelwe oswenkwa nezinye izifundazwe zibekwe ngohlu lwazo.
Abantu abaningi babone le kuyinto yokubalekela izindleko zeValentine’s Day ebiyizolo. Abesifazane nabo sebesabise ngokuthi bazophambana namadoda uma ebuya kule ‘nkomfa’ nabo ayobamba isiguqo sabo.