I-Peugeot 308 Allure iyakhanga ngobuhle

BESE kunesikhathi ngagcina ukushayela imoto yakwaPeugeot ngakho ngesikhathi kuvela ithuba ngigxume ngahlala.

Bese ngiphila ngokufunda ngazo nje futhi ngibone ukuthi bayazincoma ozakwethu indlela ezakhiwe ngayo. Ngaphakathi inhliziyo ibilokhu ilobiza ukuthi mhla kubizwa amagama elami livele ukuze ngikwazi ukukuzwa konke lokhu abakhuluma ngayo.

Engithole ithuba lokuyivivinya yiPeugeot 308 Allure. Into yokuqala ofike uyiqaphele kuyo wubuhle bayo. Esiyivivinyayo inombala obomvu ogqamile. Ngaphambili ine-chrome kwi-grille nangakumafog lights ngezansi. Amalambu makhulu anamaLED daytime running lights. Uyakwazi ukukhanyisa amalambu ngokhiye.

Shona eceleni, le-chrome ekwigrille ikhona futhi kodwa lapha isemawindini. Amakhava ezibuko nezibambo konke kufana nombala wemoto. Amarimu angu-16 inch futhi engikuthandayo wukuthi nesipele ebhuthini sinerimu.

Okunye engikubonayo wukuthi ibukeka incane kahle. Bheka ngoba ubude bayo bungu-4 253mm, ukuphakama kwayo ngu-1 457mm kuthi ububanzi bube ngu-1 804mm uma ungazibali izibuko. I-wheelbase ngu-2 620mm.

Ngaphakathi kodwa ivulekile futhi abagibeli abayisihlanu bahlala ngokukhululeka. Nesempahla isikhala sikhulu kwazise ibhuthi lingu-385 litres kanti uma ulalise izihlalo isikhala siba ngu-1 224 litres.

Izihlalo zangaphambili zintofontofo futhi ngathi ziyakusekela emaceleni uma uhleli kuzo. Wena njengomshayeli unesiteringi esincanyana futhi sijika kalula ngaphandle kokufaka amandla. Engikuthandile wukuthi ithatha indawo encane ukujika nokwenza kube lula ukuchusha edolobheni.

Okunye okungihlabe umxhwele ngengaphakathi layo wukuthi i-dashboard ayinalo uxhaxha lwamabhathini. Kune-screen, esibheke ngakumshayeli, okuyilapho uhlela khona zonke izinto zakho kusukela kumsakazo kuya kwi-aircon.

Umsakazo udlala i-USB neBluetooth futhi iCD ayidlali. Bekungaba mnandi ukuba izipikha zifuqa umsindo othe xaxa. Esiteringini kunamabhathini okulawula umsakazo.

Ngemuva kwesiteringi kunawokulawula i-cruise control ne-speed limiter. Ngathi ungaqala uwabuke kuqala ukuthi asebenza kanjani ungakahambi ngoba acashile emuva kwesiteringi.

Kunendawo yokuxhuma ishaja kwi-12V socket kanti kukhona enye futhi ngemuva kwesihlalo ngemuva.

Kuningi okunye enakho njengokuthi izishayele ama-wiper uma lina, izikhanyisele amalambu uma kumnyama, ama-sensor akusiza uma upaka nokunye.

Ngesikhathi sengiyifaka emgwaqeni ngiqale ngaba nenkinga kancane negiya. Liwumshini ozishintshayo onamagiya ayisithupha aya phambili kodwa indlela olifaka ngayo akuyona le eyejwayelekile. Kumele ulehlise sakulisa eceleni kodwa kuphele isonto sesijwayelene ngoba kubhaliwe futhi nokuthi ulihambisa kanjani. Ngemuva kwalo kukhona i-handbrake eyibhathini.

Inenjini engu-1.2 litre eyithree cylinder ne-turbo. Uma isihamba ayilokhu idonseka kancane ngaphambi kokungena ejubaneni futhi uma uyifaka ku-sport, iyashesha. U-gearbox ushintsha ngesikhathi esifanele.

Uze ukhohlwe ukuthi injini incane ngoba ayizwakali. Esewonke amandla ayo angu-96 kW ne-torque engu-230 Nm. Ukusuka ku-0 iye ku-100km/h kuyithatha imizuzwana engu-9.8 kanti ijubane elikhulu ngu-206 km/h.

Ngakuphethroli ibidla kahle isebenzisa amalitha angu-6.4 ngo-100km kanti okuhle wukuthi ithangi likhulu kwazise ngu-53 litres.

Ngakwezokuphepha ifika ne-Advanced Breaking System (ABS), Electronic Stability Program (ESP), Electronic brakforce distribution, emergency brake assist, emergency brake assist, traction control, central locking, hill assist nokunye, amaairbag omshayeli nomgibeli, awasemaceleni ne-curtain airbag.

Ayikho into engiyibona ingenza le moto ingadayisi ngoba kumnandi ukuhamba ngayo. Akusiyona imoto othi uyishayela ube uhalela ezinye emgwaqeni. Yinhle, inobuchwepheshe futhi ivuleke kahle. Inani 308 Allure 1.2 Turbo Auto R369 900

Ifika ne-service plan yeminyaka emine noma u-60 000km kanti kumele iye kwisevisi ngemuva kokuhamba u-15 000km noma unyaka.