U-Ankel uzothunwa ngoMgqibelo KwaMakhutha
UZONGCWATSHWA ngoMgqibelo KwaMakhutha usomahlaya waseThekwini, uSibusiso “Ankel” Shangase, oshone ngesonto eledlule ngemuva kokugula isikhathi eside.
Imininingwane yokungcwatshwa ivezwe nguThokozani “Tzozo” Zulu.
Amaciko aseThekwini izolo ahambe ayohlangana nomndeni.
“Sihlangane eMega City, eMlaza, sase siya kubo KwaMakhutha sayobabona ukuze sikhale nabo,” kusho uTzozo.
Uthe ngoLwesine bahlela ukuba nenkonzo yesikhumbuzo eThekwini, lapho iningi lizothola khona ithuba lokuvalelisa.
“Ngisazohlangana noMfundisi Vusi Dube ngizwe ukuthi kungaba njani uma ingenzelwa ebandleni lakhe njengoba kuke kwenzeke. Umngcwabo wakhe umndeni uthe uzoba ngoMgqibelo,” kusho uTzozo.
Umndeni ka-Ankel uveze ukuthi ubeguliswa yi-TB yesisu.
Udadewabo, uBusisiwe, uthe le-TB iyona egcine imnqobile.
U-Ankel ushonele esibhedlela esizimele eHillcrest lapho kuvele khona ukuthi ubesegula ngendlela yokuthi isifo besesingawezwa namaphilisi.
Uveze ukuthi odokotela bebecabanga ukuthi unofuba kodwa emasontweni adlule bathola ukuthi yiTB yesisu.
UBusisiwe uveze ukuthi umfowabo uke wawayeka amaphilisi ngenxa yokungasizakali.
U-Ankeli uzakhele udumo ngokuqhulula amahlaya eWorkshop eThekwini wagcina esephatha imicimbi emikhulu eThekwini.