Kukhona okunuka santungwana eNquthu
Nkabiyahlaba KWANDENGEZI MHLELI: Ngithi mangisike elijikayo njengesakhamuzi saseNquthu. Odabeni lwentuthuko ngingasho ngingananazi ukuthi uMkhandlu weseNquthu uhluleke wancama ukuhlinzeka umphakathi ngezidingo.
Kuyimanje ku-ward 13 kunenkinga yekhansela lakhona elingayibizi imihlangano yomphakathi njengoba ubhekene nenkinga yamanzi ukuthi kwenzenjani.
Siyazi ukuthi udaba lwamanzi luphethwe yisifunda saseMzinyathi kodwa phela yena njengekhansela kumqoka ukuthi abize umphakathi azowuchazela ukuze ungadukuzi ebumnyameni.
Kuyimanje kunezindawo la kuzinze khona Inkatha abantu bakhona bashaya ngezigubhu zikagesi ezingaphezulu kwesisodwa. Lona leli khansela lakuyo le ward ngikhuluma nje kunengane yalo eliyifake emsebenzini kuMasipala waseNquthu.
Ngike ngathi ngisezinkundleni zokuxhumana ngabona nenkulumo yephini lemeya uNothile ebalula izinto asebezenzile bengumkhandlu waseNquthu kuward 14 okuyiselokishini. Ubalule ukuthi sebakhe umgwaqo kaR9 million, omunye kaR39 million, ugesi kaR24 million, inkulisa iMpumelelweni kaR1.3million namahhovisi okuhlolwa ukushayela kaR6 million.
Bengifisa kuphenywe ngalezi zinto ezithe zabalulwa yiphini lemeya yomkhandlu ukuthi sezingenziwa ngemali engaka. Kukhona okunuka santungwana.
Ngifisa futhi kuphenywe ngokuqashwa kwama-general worker. Nakhona indlela abaqashe ngayo ishayisa amakhala. Kunomunye nje obehlale encoma izikhulu zomkhandlu namuhla bamdonse ngengalo bazomfaka emsebenzini.
Indlela abenza ngayo benza abantu baseNquthu bangaphinde babuthembe ubuholi babo.
Uma kungathiwa akube nokhetho lokuchibiyela kusasa nginesiqiniseko sokuthi akekho noyedwa onganika Inkatha ivoti lakhe. Okhathazekile ENQUTHU