Injabulo ngeyokuguga nosizi kwabeqolo
ZIHLEKA zodwa izalukazi namakhehla njengoba imali yempesheni izokwenyuka ngemuva kokuthi uNgqongqoshe wezeziMali uMnuz Tito Mboweni, ememezele ngesikhathi ethula isabelo sezimali izolo.
UMboweni uthe uhulumeni ubeke uR500 billion ozosetshenziselwa ukwenyusa imali yezibonelelo kusuka ngoEphreli.
Imali ezonyuka eyempesheni yobudala, isibonelelo sabadinga ukunakekelwa, isibonelelo esinikezwa ababengamasosha sizokhuphuka ngoR80. Isibonelelo sezingane esaziwa ngemali yeqolo sizokwenyuka ngoR10, ngo-Epreli isuke kuR410 ibe nguR420, ngoOkthoba inyuke ngomunye uR10 ibe nguR430, eholwa ngabakhulisa izingane okungezona ezabo, ifoster care grant uthe izokwenyuka ngoR40, isizoba uR1000.
UNkk Edister Shangase wakwaSanti ohola imali yobudala uthe ujabule kakhulu ngokwenyuswa kwemali yempesheni.
“Ngijabule kakhulu, ngiyacabanga ukuthi uhulumeni ubonile ukuthi imali yabantu abadala yondla imindeni, izingane azisalambi, ayisekho ingane ehamba ibekwa ezihlotsheni ngoba singoninakhulu siyahola sithenge ukudla badle abazukulu,” kusho uNkk Shangase.
UNkk Khethiwe Myeza waKwaMashu uthe: “Njengoba sithole uchatha sizokwazi ukubhekana nezindleko zokwenyuka kokudla, uhulumeni usisize kakhulu.” Nakuba bejabule kangaka abadala kodwa abahola iqolo bathi uhulumeni akabacabangelanga njengoba imali yeqolo izokwenyuka ngoR10. UNksz Lisakhanya Nyandeni waseVryheid uthe: “Ngiphoxeke kakhulu ngemali okwenyuswe ngayo eyeqolo. Imali yeqolo ngiyisebenzisela ukukhokhela imoto ehamba ingane uma iya esikoleni benginethemba lokuthi okungenani sizofakelwa uR40. UR10 mncane kakhulu akusaphumi nesinkwa.”
UMboweni umemezela lokhu nje inkampani eholela izimpesheni iSA Social Security Agency (Sassa), isenezinkinga zokuholela abantu bakuleli abangaphezulu kukaR17 million bempesheni ngemuva kokushintsha kwezinkampani eziholela abantu.
ISassa inikeze iposi inkontileka ngemuva kokuphela kwenkontileka ebinawo neCash Paymaster Service (CPS).
I-EFF ibiphakamise ukuthi uMboweni amemezele ukuthi imali yesibonelelo inyuke ngokuphindaphindiwe kwehliswe iVAT, ibuyele ku14%.
Umngcinimafa ulindele ukuthi isibalo sabahola impesheni nezibonelelo zikahulumeni senyukele ku18.1 million ngasekupheleni kuka -2019.