Intokozo kuklonyeliswa izikole ezizikhandlayo
ZIKLONYELISIWE izikole zaseMlaza ezenze kahle ngonyaka ophelile.
Isikole iMenzi High neVelabahleke High zithole izindondo zokwenza kahle emva kokuthola u-100% ku-matric ngonyaka odlule.
Izikole ziklonyeliswe yiCareers Exhibition and Information Association (CEIA), okuyinhlangano ehlanganise izikhungo zeMfundo ePhakeme namabhizinisi.
Le nhlangano, esebenzisana noMnyango wezeMfundo, ilekelela abafundi uma bekhetha imisebenzi abathanda ukuyenza, iphinde igqugquzele nokwenza kahle ezikoleni jikelele.
Uthishanhloko waseVelabahleke, uMnuz Bheki Mhlongo, uthe ukuthokozele kakhulu ukuklonyeliswa kwesikole esingaphansi kwakhe ngokuthi senze kahle.
“Sikujabulela kakhulu ukuthi kukhona abazisa ukwenza kwethu kahle. Lokhu kuyasigqugquzela ukuthi sizimisele kakhulu ukuze sihlale sisezingeni eliphezulu,” kusho uMhlongo.
Uthe yize bezikhona izinkinga abebehlangabezana nazo njengothisha kodwa bakutholile lokhu abebekuphokophelele.
“Sibhekane nezinselelo eziningi njengesikole okubalwa nabanye abazali abebenza kube nzima ukusebenzisana nabo kodwa sisebenze ngokuzikhandla sathola imiphumela emihle,” kusho uMhlongo.
Uthishanhloko waseMenzi High, uNksz Muntu Ntombela, uthe bayasihlonipha isikhathi nokuyikho okwenze baphumelela kahle ngonyaka odlule.
“Sihlale sikuqinisekisa ukuthi sinesikhathi esiningi sokubuyekeza esikufundile siphinde sisize abafundi ababamba kancane ukuze kuphumelele bonke abafundi,” kusho uNksz Ntombela.
I-CEIA ibihlanganyele nenhlangano Ikamva Youth elekelela abafundi ngezifundo neNtokozo FM ukuzoklomelisa izikole.
UMnuz Wonderboy Zungu, weMANCOSA engaphansi kweCEIA, uthe bafuna ukuqinisekisa ukuthi bonke abafundi bayazuza ngezinhlelo zabo.
“Sifuna ukuhlinzeka bonke abafundi ngolwazi olufanele futhi olwanele mayelana nokungena ezikhungweni zemfundo ephakeme. Sigqugquzela nokwenza kahle kwabafundi ezikoleni,” kusho uZungu.
I-CEIA ithe izoqhubeka nokuklomelisa izikole ezenze kahle ngenhloso yokuzigqugquzela. Ithe izoqoqa nolwazi ezikoleni ezenza kahle ukuze ilekelele izikole ezingenzi kahle.