Usuku lokufihlwa kwemeya eshonile
IZOFIHLWA ngoMgqibelo eMtulwa iMeya yaseMshwathi uNkk Siphindile “Maphindi” ZondiMbhele.
UMasipala waseMshwathi uveze ukuthi bazoqala ngenkonzo yesikhumbuzo ezoba namhlanje ehholo lomphakathi eCool Air, kusukela ngo-12 emini. Inkonzo yomngcwabo izoba senkundleni yezemidlalo eMtulwa ngo-9 ekuseni.
UNkk Zondi-Mbhele (44) ushone ngeSonto ebusuku esibhedlela emva kokugula isikhashana. Uke waba wuthisha esikoleni eNadi Primary.
Ngo-2000 wakhethwa waba yikhansela ku-ward 3 waphinde waba yiphini leMeya yaseMshwathi.
Ngo-2016 uqokwe njengekhansela elimele iqembu emkhandlwini, wabe eseqokwa njengeMeya yaseMshwathi.
Ngokusho kokhulumela umndeni, uMnuz Mandla Zondi, imeya yaya kudokotela ngoLwesihlanu iyobheka isimo sempilo yayo yabe isilaliswa emuva kokuthi kube nokuthile udokotela angakubonanga kahle ngempilo kamufi. Uthe umndeni ushaqekile ngokudlula kwakhe emhlabeni.
Ngokwesitatimende esithunyelwe wuMasipala waseMshwathi, uNkk Zondi-Mbhele waziwa kakhulu ngamagalelo akhe okuthuthukisa umphakathi, okubalwa isikhungo esakhiwa iThusong Centre, imigwaqo okubalwa u-D1013, izindlu ku-ward 7, ihholo laseMbhava, ihholo laseSocolile, irenki yaseBhamshela nezinkundla zemidlalo ezehlukene.
Imeya iphinde yanconywa ngokusukumela udaba lokufakwa kukagesi ku-ward 3, 4 no-5.
Ngaphezu kwalokho ibisukumela izinhlelo ezehlukene zabadala, abancane nabakhubazekile.
Umndeni kaNkk Zondi-Mbhele uthe ubengenabo abantwana.