Izikhungo zamaciko engcupheni yokuvalwa

I-DA eThekwini ithi izindawo zamaciko okubalwa kuzo iBat Centre, iWushwini nezinye zisengcupheni yokuthi zivalwe ngenxa yokuntula imali ngemuva kokuthi uMkhandlu weTheku uhluleka ukugcina isithembiso sokuzixhasa.

Ikhansela leDA eThekwini, uMnuz Thembelani Gumede, lithe kubaphatha kabi ukuthi izindawo zamaciko zingaze zivalwe ngenxa yokuntula imali. “NgoDisemba ngonyaka odlule, umkhandlu wakhipha uR7 million uxhasa imicimbi ebingahlangene nezobuciko, kuleyo micimbi kukhona nalowo wokushaywa kwamathayi wezimoto, lowo mcimbi wenziwa yize iDA yayithi ayihambisani nawo,” kusho uGumede.

Uthe iNhloko oPhikweni lwamaPaki nezokuNgcebeleka eMkhandlwini weTheku, uMnuz Thembinkosi Ngcobo isanda kuthembisa ukuthi izozama uR4 million ukuze kusizwe lezi zindawo.

“Lezi zindawo ezingu-17, okubalwa kuzo iBat Centre, i-African Art Centre, iKZN United Music Industry Association neWushwini azikalutholi uxhaso ezathenjiswa lona, zonke ziqhuba izinhlelo ezibalulekile zokuvundulula amakhono entsheni,” kusho uGumede.

Uthe kuyihlazo ukuthi umkhandlu ukwazi ukwenza imicimbi ngemali okumele ngabe ixhasa amaciko asafufusa.

Ethintwa uNgcobo izolo, uthe bazokwazi ukuphawula ngalolu daba ngemuva komhlangano wekomiti ozoba namhlanje.

Imizamo yokuthola abaphethe lezi zikhungo ayiphumelelanga njengoba uJerry Pooe wesikhungo iWushwini Arts, Culture and Heritage Centre ucingo lwakhe beluvaliwe lungemukeli nemiyalezo.

Okhulumela iBat Centre uMise Malange unxuse ukuthi athunyelelwe umyalezo okuze kwashaya isikhathi sokushicilela engawuphendulile.