Isifundo ngokuvalwa kweBosasa
AMABHANGE, iFNB ne-Absa azovala ama-akhawunti enkampani, i-African Global Operations ebiyaziwa ngeBosasa ngenxa yezinsolo zenkohlakalo ezenziwe kwiKhomishana ephenya ngokulawulwa kombuso yidlanzana eholwa yiJajaji uRaymond Zondo.
Lezi zinsolo zenziwa ngowayeyisikhulu seBosasa, uMnuz Angelo Agrizzi, owageqa amagula ethula ubufakazi kwikhomishana ngemikhuba yenkohlakalo athi babeyenza iminyaka ukuze bathole amathenda kuhulumeni.
La mabhange azovala ne-akhawunti yeTrust yomndeni ka-Agrizzi. Bekukhonya bona kumathenda oMnyango wokuHlunyeleliswa kweziMilo njengoba bebehlinzeka amajele cishe ngazo zonke izidingo, imisebenzi okuthiwa ibangenisele ngaphezudlwana kancane kukaR4 billion.
NgoMsombuluko i-African Global Operations imemezele ukuthi isifake isicelo sokuvala inkampani ngenxa yokuthi amabhange azovalaama-akhawunti abo ngoba ngeke kusebenzeke ngaphandle kwama-akhawunti.
Lokhu okwenzeka kule nkampani kuyafana nokwenzeka ezinkampanini ezaziphethwe yiziqumama zakwaGupta nazo ezavalelwa ama-akhawunti asemabhange yiwona wonke amabhange akuleli nokwaholela ekutheni iningi lazo liwe kudilizwe abasebenzi.
Kusukela ethule ubufakazi u-Agrizzi usubekhona umnyakazo okhombisa ukuthi kukhona abazoshushiswa njengoba yena nabanye abayisithupha sebeke baboshwa kanti kumanje bangaphandle ngebheyili. Umnyakazo yiyona nto efunekayo ngoba sesidlulile isikhathi sokuthi kulokhu kubatshazwa inkohlakalo kodwa abayenzayo bangathathelwa zinyathelo.
Naso isinyathelo samabhange sihle nakuba-ke ngebhadi kusho ukuthi kunabantu abangu-4 500 abazolahlekelwa ngumsebenzi futhi cishe iningi labo okungesibo abebesekhaleni lale nkohlakalo.
Kodwa-ke futhi kukhona abanye okuzobavulela amathuba amasha ngoba kuzodingeka kutholakale ezinye izinkampani ezizohlinzeka uhulumeni ngemisebenzi ebekuqokwe kuyo i-African Global Operations.
Sengathi bangakhumbula nalabo abasayiqhuba inkohlakalo ukuthi izenzo zabo zigcina zichaphazela abantu abangenacala.