Bashiswe 5 kwashona ingane belele
KUSOLWA isoka ngokungqongqisa abane belele endlini, kwashona nengane yalo (5) endaweni yaKwaDesai, ngaKwaNdengezi, izolo.
Kulesi sigameko kushone uSinenhlanhla Mkhwanazi (5) kanti unina, uNksz Zodwa Mkwanazi, udadewabo uNksz Sibongile Mkhwanazi nomlamu wakhe uMnuz Khanyisani Mpanza basesimeni esibucayi esibhedlela ngemuva kokusha.
Kuthiwa uNksz Mkhwanazi (Zodwa) uxabane noyise wengane yakhe ahlala naye eLuganda, wabe esebalekela kwaDesai emzini okuqashe kuwo udadewabo nesoka lakhe, lapho okwenzeke khona isehlo.
UNksz Sizakele Ndlovu wakulo muzi, uthe uNksz Mkhwanazi uqale waxabana noyise wengane yakhe, ngaphandle kwalo muzi.
“Baqale bahilizisana beme ngaphandle kwesango, belokhu bethukana. UZodwa wabe esebuyela endlini kasisi wakhe, wamvalela ngaphandle,” kusho uNksz Ndlovu.
Uthe owesilisa obebukeka ecasukile ube esesonga ngokuthi bazobona ukuthi bazophuma kuphi njengoba bemvalele ngaphandle wase wahamba.
“Ubuye ephethe isikhwama sengane yabo ebesinekhadi lasemtholampilo, isitifiketi sokuzalwa nomfaniswano wesikole wayokubeka komunye umuzi oseduze nalapha waphinda wahamba,” kusho uNksz Ndlovu.
Uthe bekusezintatha ngenkathi bezwa ukuqhuma okuvuse nabanye omakhelwane, okusolakala ukuthi bekungumabonakude obususha.
“Ngesikhathi sivuka sibone umnyango wegumbi labo uvutha kuphuma nentuthu. Bekuzwakala kancane amazwi abantu bememeza. Sizame ukuwuvula umnyango kodwa wangavuleka kwaphoqeleka ukuthi siwukhahlele.
“Namanje into engiyibone ngenkathi kuvuleka umnyango inyantisa igazi. Bese bebucuke izikhumba bengakwazi nokuhamba, bagaqe ngamadolo baze bafika emnyango balala phansi bekhala ngokushiselwa,” kuqhuba uNksz Ndlovu.
Uthe nezingane ezincane ezibone laba abane zizodinga ukwelulekwa ngokwengqondo ngoba isimo besihlasimulisa umzimba.
Uthe ngenkathi ebuza uSibongile ukuthi kwenzekeni, uphendule wathi umsolwa obashisile futhi ujwayele ukwenza izinto ezifana nale. Abane abashisiwe baphuthunyiswe esibhedlela lapho kufike kwashona khona uSinenhlanhla.
Ngenkathi Isolezwe lifika endaweni yesigameko lihogele iphunga likaphethroli ebelisemnyango wegumbi okwenzeke kulo isigameko.
Umfowabo wezelamani zakwaMkhwanazi, uMnuz Jabulani Mkhwanazi uthe umndeni wakhe ukhungathekile ngesehlo esenzekile.
“Inhliziyo yami ibuhlungu kakhulu. Namanje angikwazi ukucabanga kahle. Okubuhlungu kakhulu ukuthi sekudlule nengane emhlabeni,” kusho uMkhwanazi.
Umphakathi uthe ukhathazekile ngesigameko esinesihluku esenzeke endaweni.
“Sithukile ngale nto eyenzekile ngoba asikaze sibe nezigameko ezifana nalesi kule ndawo.
Sifisa kube khona okwenzekayo ngalokhu ngoba akumele kuphinde kwenzeke into efana nale,” kusho uNksz Ndlovu.
Ikhansela lakule ndawo, uMnuz Reginald Cloete, lithe liyazwelana nemindeni elahlekelwe.
“Ngiyathemba ukuthi amaphoyisa azosebenza ngokuzikhandla, ukuze kube khona ojezayo ngalokhu,” kusho uCloete.
Okhulumela amaphoyisa KwaZulu-Natal uCol Thembeka Mbele, ukuqinisekisile ukushiswa kwabantu abane, wathi bayaphenya.