Ilaka likaMaine ngomengameli wezwe
UMENGAMELI we-ANCYL, uMnuz Colleen Maine uthi emuva kukaMengameli Cyril Ramaphosa kufanele umengameli wezwe aphume komengameli bakudala be-ANCYL. Ubale kubo uMnuz Malusi Gigaba, Fikile Mbalula naye.
“Sikulungele ukuhola i-ANC futhi ngiyaphakamisa ukuthi emuva kukaMengameli Ramaphosa kungene umengameli owayekwiYouth League. Kungaba wuGigaba, Mbalula nami ngikulungele ukuhola izwe,” kusho uMaine.
UMaine ubeseMansfield Hall, eDUT eyokhankasela i-ANC.
Uthe kuyihlazo ukuthi iSasco ayisaphethe eDUT sekubusa i-EFF Student Command.
“Kunesilwane esibi esihlasele i-ANC okuwuqhekeko. Ngisho kwiSasco siyasibona lesi silwane. Kufanele silwe naso. ISasco ayibumbane ikhiphe laba bezikibha ezibomvu ezikhungweni zemfundo ephakeme. Angiyithandi indaba yokuthi izitshudeni seziholwa abantu bezikibha ezibomvu. Asilwe nale nto sibumbane,” kusho uMaine.
Uthe usekulungele ukuphuma kwiANCYL ngoba noMbalula waphuma eneminyaka ewu-38.
“I-ANCYL idinga umholi ozokhuluma ngaphandle kokusaba. Mina angisakwazi ukusho noma yini ngoba ngisesigungwini esiphezulu se-ANC. Ngizohambela izifunda ezihlukene nginxenxe abantu ukuthi bavotele umholi othile ngoba ukhona engimbona ezosiyisa kule ndawo okufanele siye kuyo,” kusho uMaine.
Uthe ngeke amgagule lo mholi kodwa “u-direction”.
Lokhu kuthathwe ngokuthi weseka uNobhala we-ANCYL KwaZulu-Natal uMnuz Thanduxolo Sabela, umkhankaso wakhe obudume nge-One Direction.
UMnuz Malusi Gigaba ugqugquzele amalungu e-ANC nazo zonke izinhlaka zayo ukuthi zikhankasele ukuthi le nhlangano inqobe, zingalindeli ukuthi zizothola izikhundla ezithile.
USabela uthe umhlangano wabo ubuhlose ukuvuselela amaqabane amancane ukuze agqugquzele abantu ukuthi bavotele i-ANC ngoMeyi 8.
Uthe bayazi ukuthi i-ANC izolunqoba ukhetho kodwa sebekhankasela ukuthi ithole amavoti amaningi ngokudlulele.
Uveze ukuthi uma sekudlule uMeyi 8 bafuna uMnuz Kwazi Mshengu onguSihlalo we-ANCYL KwaZulu-Natal abe wungqongqoshe womnyango othile.
“Asibafuni abaholi abagugile ngoba bayakhohlwa futhi banenkani, bagcina sebezikhohliwe nezinqumo esizithathe engqungqutheleni yangonyaka odlule. Uma engekho ungqongqoshe omncane ngeke kulunge kufanele abadala badlulisele ulwazi kwabancabe,” kusho uSabela.
UMshengu ugqugquzele abantu ukuthi baphume ngobuningi babo ngoMeyi 8 bayovota.