Amaholidi azongenisa uR1 billion eKZN
UNGQONGQSHE wezokuThuthukiswa koMnotho, ezokuVakasha neMvelo KwaZulu-Natal uMnuz Sihle Zikalala uthi azongenisa uR1 billion emnothweni waKwaZuluNatal amaholidi ePhasika aqala kusasa lweholidi likaGood Friday aze aphele ngoMsombuluko weholidi leFamily Day.
UZikalala uveze ukuthi ziwu250 000 izivakashi zakwezinye izifundazwe ezizotheleka KwaZuluNatal bese ziba wu-60 000 ezizoza kulesi sifundazwe ngamaholidi ePhasika zisuka kwamanye
amazwe. EThekwini kulindelwe izivakashi eziwu-100 000 kule mpelasonto.
Imali ingena uma izivakashi zibhukha izimoto, zithenga ukudla, zizijabulisa ezindaweni ezihlukene noma zibhukha izindawo zokuhlala.
UZikalala uthe ngamaholidi kaDisemba kwafika izivakashi eziwu-1 265 000 KwaZulu-Natal, ezingu-140 000 zazivela kwamanye amazwe.
IFederated Hospitality Association of South Africa (Fedhasa) ithe baningi abantu abazobhukha amahhotela ngomzuzu wokugcina ngoba amaningi asethanda ukugcwala njengamanje.
UMnuz Charles Preece weFedhasa uthe abantu abaningi bayathanda ukubhukha ngomzuzu wokugcina ngakho balindele ukuthi wonke amahhotela agcwale phama.
“Awakagcwali amahhotela okwamanje kodwa silindele ukuthi azobe esegwele ngoba kunabantu abathanda ukubhukha ngomzuzu wokugcina. Umnotho ongakhuli ngendlela wenza abantu bazame ukonga imali ngoba nophethroli uyanyuka, nemali yamatoll gate, zonke lezi zinto zenza abantu bazame ukonga imali,” kusho uPreece.
UNksz Phindile Makwakwa oyisikhulu esiphezulu esisabambile seTourism KwaZuluNatal (TKZN) uthe inhloso yabo wukwandisa isibalo sezivakashi eziza KwaZulu-Natal ngakho basebenza kanzima ukwenza lokhu.
“Siyajabula ukuthi abantu bakhetha ukuzohlala KwaZuluNatal ngoba kuningi esibaphathele kona. Sihlale sizibuza ukuthi yini esingaheha ngayo izivakashi futhi sinyusa nezinga lokuphathwa kwazo ngaso sonke isikhathi. Izivakashi eziningi eziza KwaZuluNatal zisuka eGauteng bese ezisuka kwamanye amazwe eziningi zisuka e-United Kingdom, Germany nase-United States,” kusho uNksz Makwakwa esitatimendeni.
Ngonyaka odule uthe kwafika izigakashi ezingaphezu kuka-429 174 KwaZulu-Natal.
Uthe amaholidi ePhasika aza nezivakashi eziningi ngoba eziningi zisuke zize ezinkonzweni.
Ezinye zizohambela iBuddist Retreat Centre eseXobho nakumaJummah Mosque.
Ezinye zizohambela Ushaka Marine World ziyodlala i-Easter Egg Hunt kusukela ngo-Ephreli 20 kuya ku-Ephreli 21 ngo-9 ekuseni kuze kube wu-2 ntambama.