Isexwayiso kubefundisi ngokuminza kwamakholwa
KUNXUSWA amakholwa nabefundisi abazovakashela emabhishi ehlukene beyobhabhadisa ukuthi baqaphele ukuthi amanzi abangena kuwo awashoni kakhulu.
Kuthiwa ngalesi sikhathi sePhasika kunamabandla abhabhadisa abazalwane bawo olwandle okubeka engcupheni amakholwa nalabo abasuke bezobhabhadiswa abasuke bengawajwayele amanzi.
UMnuz Sputnik Ratau, okhulumela uMnyango wezaManzi nokuThuthwa kweNdle, uthe nyakenye kube nesibalo esikhulu sabantu abaminze emifuleni, emadanyini nasolwandle ngalesi sikhathi.
“Ukwenyuka kwesibalo sabantu abashona ngenxa yokuthi babe nenkinga bebhukuda noma benza okuthile emanzini kuholele ekutheni siwumnyango siqinise umkhankaso wethu wokufundisa ngokuphepha emanzini, iWater Saftey Campaign,” kusho yena.
Uthe njengoba kungamaholidi ePhasika iningi labantu lizochitha isizungu ezindaweni ezehlukene livakashele izihlobo nabangani. Kulezo zindawo kukhona amadamu, amachibi nemifula.
“Abazali mabaqaphele ukuthi izingane aziyi emifuleni ngoba kungenzeka zithi ziyobhukuda ngoba zibona ezinye bese ziba nenkinga,” kusho yena.
Ucwaningo olwenziwe yiNyuvesi yaseKapa iCape Peninsula University of Technology neLifesaving South Africa luveza ukuthi kunabantu abangu-100 000 eNingizimu Afrika abashona ngokuminza.
Ngokombiko wenhlangano yezempilo iWorld Health Organisation (WHO) wango-2012 kuvela ukuthi ukuminza kungezinye zezinto ezibulala abantu abashona ngokungeyona indalo emhlabeni. Uma kuqhathaniswa nezinye izifo ukuminza kungokwesithathu ezintweni ezibulala abantu ngokungeyona indalo.