Izizathu zokukhuphula imali yezidingo
KULIQINISO ukuthi ukuntenga-ntenga komnotho ezweni, kunomthelela omubi ekusebenzeni kukahulumeni. Isabelo-mali komasipala, iminyango kahulumeni njalonjalo sehlile kwaholela ekutheni kuliwe nokumosheka kwemali ukuze imali iye ngqo ezinhlelweni zentuthuko.
Nomasipala waseThekwini uyathinteka kulesi simo izwe elibhekene naso. Eyabantu bakithi abampofu ayisakhulunywa ngoba abanye babo abangasebenzi, abanye abahola kancane kodwa kufanele babhekane ngqo nokukhuphuka kwemali yokukhokhela izidingo ezifana nogesi, amanzi, ukuthuthwa kwendle nokunye kuso lesi sikhathi esinzima.
Siyezwelana nezakhamuzi zethu okumanje seziqalile ukuzwakalisa ukunganami kwazo kulandela iziphakamiso zethu zokuthi kukhuphuke ukukhokhelwa kwezidingo ezihlinzekwa umasipala wethu.
Kufanele kuzwele kubantu bakithi ngoba eqinisweni isimo somnotho sibi kakhulu kodwa asibonge ukuthi uhulumeni wethu kuzwelonke wenza konke okusemandleni ukudlula kuso.
Asikuqonde ukuthi umasipala ngeke uvuke ekuseni ukhuphule ukukhokhelwa kwalezi zidingo kodwa kunezizathu ezinqala ezibangela lokhu.
Futhi ayikho neyodwa into
esijabulisayo ngokukhuphula imali. Ngaso sonke isikhathi uma sihlanganisa amakhanda sibhunga ngesabelo-mali sonyaka wezimali olandelayo, sibeka eqhulwini inhlalakahle yezakhamuzi kuqala.
Kodwa ngenxa yezimo ezingaphezu kwamandla, sibe sesiphoqeleka ukuthi sigcine sithathe izinqumo ezingehli kahle emiphakathini yethu. Ukube siyazenzela ngabe akukhuphuki ukukhokhelwa kwalezi zidingo ngoba siyalwazi usizi olubhekene nathi sonke.
Kumele sicacise ukuthi amanzi aphuzwa eThekwini athengwa kuMgeni Water. Uma uMgeni Water uthatha isinqumo sokukhuphula imali esithenga ngayo la manzi, siba senkingeni kakhulu ngoba nathi kuyasiphoqa ukuthi sibuke ukuthi singawakhuphula kangakanani ngoba ukungenzi njalo, kuyosenza sibe nezinkinga ngakwezimali ukuthi siphakele amanzi ahlanzekile ngokungenamkhawulo.
U-Eskom naye futhi siyakuqonda cishe sonke ukuthi umasipala wethu uthenga kuye ugesi. Nabo futhi bakhuphule imali esiwuthenga ngayo ugesi nokwenza ukuthi nathi senze iziphakamiso zokuthi siyikhuphule le mali kwizakhamuzi ezingamakhasimende ethu.
Okunye ukuthi baningi abantu ngaphansi kukamasipala wethu abampofu okufanele kuhlangabezwane nezidingo zabo ngokwenqubo mgomo kamasipala.
Nakho lokhu kumba eqolo ngoba phela ukuze sikwazi siyahlangabezana nezidingo zabo. Badinga izindlu, amanzi, ugesi nokunye.
Ukwanda kwemiphakathi kusho ukwanda kwesibalo sabantu okufanele bathuthelwe udoti nakho okusidla amakhulu ezigidi zemali. Lezi izibonelo nje ezimbalwa ezicacisa umthwalo osemahlombe omasipala weTheku.
Angisho futhi ukuthi sibhekene nenkinga yokwebiwa kwezinto ezifana nogesi, amanzi nokunye. Sikhuluma nje ngonyaka ngogesi uwodwa silahelekelwa imali nguR150 million ngenxa yalobusela.
Okubuhlungu ukuthi imiphakathi yethu iyabazi lobugebengu kodwa ayisilekeleli silwe nabo. Siyazama ukunqamula izinyoka-nyoka kodwa futhi ngakusasa abanye bethu ibona kanye abalekelela labo abanqanyulelwe ukuthi baphinde bantshontshe ugesi.
Ngomhla ka-15 Ephreli siqalile ukuhlangana nemiphakathi yethu ukuzokhuluma ngazo zonke lezi zinto nesabelo-mali sikamasipala uqobo.
Le mihlangano izoqhubeka kuze kube umhla ka-20 Meyi. Ngokusebenza ngokubambisana, singakwazi ukuqhamuka nezisombululo esizozuza sonke kuzo. Ngakho masibambane ngezandla sikhulise izwe lakithi. UNzuza uyimenenja kuMasipala weTheku