Abaqikelele abantu abahlela ukuthatha umhlalaphansi
EMINYAKENI embalwa edlule kwaba nesidididi abasebenzi bakahulumeni beyeka ubuthaphuthaphu emsebenzini bethuswa ukuthi uhulumeni uhlongoza ukushintsha umthetho olawula izimpesheni.
Lesi siphakamiso esibizwa ngama-retirement reforms sasithi uhulumeni ufuna kwenzeke into efanayo kuwona wonke umuntu, uma esethatha umhlalaphansi kungakhathaleki ukuthi uyilungu le-pension fund, provident fund noma le-retirement fund.
Okukhulu kulokhu okwakuphakanyiswa kwakungukuthi wonke umuntu uma eseya empeshenini kuzomele asebenzise u-Ҁ wesamba sakhe ukukhetha uhlelo lwempesheni oluzomholela nyanga zonke bese u-ѿ kube awuthathe uyisamba.
Uhulumeni wawuthi lokhu ukwenzela ukuthi uma abantu bethatha yonke imali yempesheni abanye bagcina sebehlupheka ngenxa yokungayisebenzisi kahle.
Njengamanje uma umuntu ekwi-provident fund uyakwazi ukuthatha yonke imali yakhe, akaphoqelekile njengakwi-pension fund ukuthi u-Ҁ athenge ngawo uhlelo lwempesheni lwanyanga zonke.
Mukhulu umonakalo osuwenzekile kusukela kwamenyezelwa lesi siphakamiso ngo-2016 ngoba ukudideka ukuthi uhulumeni wayeqondeni kwatatazelisa abantu, bayeka imisebenzi bengahlelile, manje abanalutho.
Sibuyisa indaba yalo mthetho nje yingenxa yesexwayiso esikhishiwe umbhali wenye yezingosi zethu, uMnuz Owen Nkomo ngezinhlelo zikahulumeni zokugqugquzela abanye abasebenzi ukuthi basheshe baye empeshenini ngoba ezama ukunciphisa izindleko zokuholela abasebenzi.
Sithanda ukugcizelela nathi ukuthi abantu bangathathi ngamawala, basibhekisise lesi siphakamiso sikahulumeni ukuze bangazitholi bezisola.
Kumele umuntu abheke isimo sakhe, impilo yomndeni wakhe nezikweletu anazo, ukuthi kuzomlungela yini yena ukusheshe aye empeshenini. Lonke ucwaningo oluvelayo muva nje mayelana nesikhathi esiphilwa ngabantu luhlale luveza ukuthi abantu sebephila isikhathi eside kunakuqala. Nakho lokho yinto abantu okumele bayibheke bangajatshuliswa ukuyeka umsebenzi kanti bazogcina sebehlupheka.