Aluxoxwe ngobunono olwabafa odlameni
MHLELI: Ngivumele ngiphawule ngodaba oluqukethwe yisihloko esithi: “i-ANC igeze umuzi ka-Archie Gumede,” oluphume kwiSolezwe mhla ka-4 Ephreli.
Njengomuntu ongumphumela womzabalazo, ngizwakalisa ukusishayela ihlombe isinyathelo se-ANC sokugeza umuzi woMholi nengqwele yomzabalazo, uMnuz Archie Gumede, owayenguMholi we-United Democratic Front. Ngiyawuncoma futhi nombono wokugeza abasala odlameni eMpumalanga nakwezinye izindawo.
Sengikushilo lokho ngifisa ukuzwakalisa ukuthi, yize zincomeka izinyathelo zikaKhongolose futhi kukuhle ukuba bakwenze lokhu kodwa kuneqiniso elilokhu ligqolozele uKhongolose neNkatha. Leli qiniso lithi kumele ngesinye isikhathi ubuholi balezi zinhlangano buhlale phansi buludingide ngokuhlanganyela udaba lwabantu abasala odlameni lweminyaka yawo-1980 kuya ko-1990 buhlonze nokudinga ukwenziwa ngalokho.
Kepha Mhleli okungiphushe ukuba ngilobe ngumlando owethulwe nguzakwethu uMnuz Cyril Xaba ngezizathu ezasusa udlame lapha KwaZulu-Natal. NgokukaNonkosi, udlame lwathungelwa wukuba abafundi basePhezulu High babenqaba ukufunda uBuntu-Botho. Okwesibili kwaba wukuthi babethi uma bezitelekela kufike amalungu eNkatha nezagila.
Owami umlando uthi udlame KwaZulu-Natal lwaqala ngeminyaka yawo-1983. Ngaleyo minyaka uhulumeni wabamhlophe owawuphethe iNatal, owawaziwa ngeNatal Provincial Administration (NPA) wanquma ukwenyusa imali yokugibela amabhasi neyokuthelela izindlu emalokishini ayengaphansi kwawo. Kwaxaka ngenkathi abaholi – uMfu Mcebisi Xundu owayenguMfundisi weBandla laseSheshi, uMnuz Msizi Dube owayeyikhansela noMnuz Richard Gumede – esikhundleni sokuba bahlangane nezinye izinhlangano – benquma ukusungula umkhankaso wabo owawuseceleni abawetha ngokuthi yiJoint Rent Action Committee (JORAC) nowachema ngokusobala ne-United Democratic Front (UDF).
Esikhundleni sokuba ibhekise impi kuhulumeni wabamhlophe, iJORAC yabhekisa impi yayo eNkathatheni. Umhlangano womphakathi owawubizwe ehholo eLamontville owawuzohlahla indlela yokulwa nalokhu kucindezelwa ngabamhlophe, wahlakazwa ngamalungu eJORACUDF. Ngaphezu kwalokho, bashisa umuzi kaNksz Ella Nxasane owayenguSihlalo kaZwelonke woMbutho waBesifazane beNkatha. Lwasukake uthuli lwezichwe okwashiswa kulo imizi yamalungu eNkatha eLamont naseHambanathi. Umkhankaso waphenduka waqondiswa kuMengameli weNkatha owayesebizwa ngomdayisi nesikhothangqoko sabamhlophe.
Ngo-1983 kwabulawa umholi neshoshozela lomzabalazo uMnuz Msizi Dube. Imfundisoze eyasatshaliswa lapho kwaba eyayithi wayebulewe yiNkatha. Kepha inkantolo eyagweba uMoonlight Gasa nabanye ngalelo cala kayizange ikhiphe isigwebo esasisola iNkatha.
Ngiyakhumbula nje ukuthi emngcwabeni wensizwa yakwaBhengu eyayibulawe ngamaphoyisa owawuseChesterville, esasiwuhambele nathi njengeNkatha, sahlaselwa lapho yintsha eyayigqoke izikibha ze-Asinamali nezazinesithombe sakhe uNzwakele. UMnuz Winnington Sabelo owayeyiLungu lomgwamanda weNkatha wahlaselwa lapho walala izinyanga esibhedlela. Thina nozakwethu uMnuz Mandla Msomi noThemba Nzimande saphuma ngesamagundane.
Ngeshwa ngo-1985 kwabulawa omunye umholi neshoshozela lomzabalazo uNkk Nontsikelelo Mxenge. Zanele zezwakala nje izindaba zokusocongwa kwakhe, kwasekusatshalaliswa imfundisoze eyayithi wayebulawe yiNkatha. Ngaleso sizathu-ke ilokishi uMlaza lavutha ngesikhathi kuhlaselwa izakhiwo nempahla kaHulumeni waKwaZulu nemizi yababaziwa ukuthi bangamalungu eNkatha noma babesebenzisana noHulumeni waKwaZulu, okwakuhlanganisa namakhansela.
Kwashiswa nezitolo namanye amabhizinisi ama-Afrika. Lokhu kuhlasela okwakuseMlaza kwasabalalela nasemalokishini afana nelaKwaMashu naseBhambayi lapho izakhamuzi ezingamaNdiya zadlelwa imizi yazo zashaywa zabaleka. Nabo-ke labo ababehlaselwa basukuma bazivikela, kwaba wukubhebhetheka kodlame njalo.
Umlando wami uthi udlame eMpumalanga lwaqala ngo1986 eSibukosezwe High lapho intsha yeHammarsdale Youth Congress (HAYCO) eyayiholwa nguMnuz Vusi Maduna, yahlasela yashisa uMnuz Bhotela Thabede owayengusihlalo wekomiti lesikole futhi engusihlalo weNkatha. Isizathu kwaba wukuthi kwakunomyalelo owawuthi akuqedwe izakhiwo ezazifana namakomiti ezikole ayethathwa ngokuthi ayecheme nesitha, ukuze endaweni yawo kusungulwe “Izinhlaka zokuphatha zabantu.”
Ngeshwa naye uMaduna wagcina ephelele ezandleni zamaqabane akhe. Isono sakhe kwaba ngukuthi wayexoxa noMnuz Zakhele Nkehli owayenguMholi weNtsha yeNkatha, ngenhloso yokudala ukubuyisana. Lolo dlame lwasabalala seluqhutshwa yintsha yaseSibukosezwe isihlangene neyaseKusa. Kuyiphutha ukuthi intsha yasePhezulu yayingafuni ukufunda uBuntu-Botho ngoba eMpumalanga leso sifundo sasifundwa ezikoleni zamabanga aphansi kuphela.
Yilokhu ebengithi angikuchaphazele Mhleli ngoba nami nginomthwalo wokufundisa intsha ye-IFP ngomsuka waleli hlazo elehlela ama-Afrika ngenkathi ecekelana phansi.
Sengiphetha ngithi thina njenge-IFP asikaze sikuphike ukuthi amalungu ethu ambandakanyeka odlameni kepha kasiziqhenyi ngalokho. Yingakho kuyaye kuthi lapho sithola ithuba lokukhuluma ngalo mlando singakushiyi ukuxolisa kwethu kubantu baseNingizimu Afrika ngehlazo elehlela umzabalazo wethu njengama-Afrika. Kepha okukhulu sifisa ukuba lezi zinto zilungiswe ngesizotha ngabaholi bazo zombili lezi nhlangano. UMbongeleni Joshua Mazibuko IPHINI LOMKHULUMELI KAZWELONKE WE-IFP