Ubona bezofeza izifiso nge-Afcon
UMDLALI weSuperSport United, u-Aubrey Modiba, ubona ukwenza kahle kwi-Africa Cup of Nations (Afcon) kungeke kujabulise isizwe kuphela kodwa kungasiza bona bengabadlali, ukufeza amaphupho okuwelela phesheya kwezilwandle.
IBafana izodlala kwi-Afcon ese-Egypt ngoJuni. UModiba ungomunye wabadlali umqeqeshi, uStuart Baxter obelokhu ebabiza esikwatini sakhe ngesikhathi kunemidlalo yokuhlunga.
Lo mdlali okwazi ukuyibamba ezindaweni eziningi, esiswini nasemuva kwesokunxele, uthe okumqoka manje wukulwela ukuthi angasali ngaphandle uma uBaxter esememezela isikwati azogadla ngaso e-Egypt.
“Kuzoba wumqhudelwano ohehayo. Umuntu sekufanele asebenze ngokuzikhandla ukuze akwazi ukuba sesikwatini esizohamba,” kusho uModiba.
Elakuleli lifakwe eqoqweni, uGroup D neNamibia, Morocco ne-Ivory Coast.
“Sidinga ukuqina ngokomqondo futhi sizitshele ukuthi singabanqobi. Lokho singakwenzela izwe, sizenzele nathi ngoba ngokwenza kahle ungakwazi ukuzitholela inkontileka enkulu. Kule miqhudelwano yilapho abadlali abaningi bekwazi khona ukuthola izinkontileka ezizobayisa phesheya. Kodwa ngeke sizifakele ingcindezi ngoba kumele sidlale ngendlela umqeqeshi azobe ehlele ngayo. Umqeqeshi uBaxter uyakholelwa ekudlaleni ngendlela ehlelekile futhi ngiyamethemba ukuthi
uzohlanganisa iqembu elizolwa,” kusho lo mdlali oqale ukuvelela emkhankasweni wakwaNedbank wokuvumbulula ikhono ngo-2015.
Uthe ukuba sesikwatini nabadlali abafana noPercy Tau oyibamba eBelgium, Lebo Mothiba noBongani Zungu abadlala eFrance, kuyabakhuthaza nabo.
“Ukuba sendaweni eyodwa nabo kuyakukhuthaza ngoba uyabona ukuthi sebekhule kangakanani ngokomdlalo. Nami ngiyaphupha ngokuya phesheya, lokho kungabuye kuzosiza lona iqembu (iBafana). Angikhathali ukuthi ngiya e-England noma iseFrance inqobo uma kuyiligi eqinile.”
Okwamanje uModiba usazogxila ekulweni nozakwabo kwi-United, ukuthi baphushe iqembu liqede endaweni engcono kwi-Absa Premiership.
Ngesizini edlule Amatsatsantsa a Pitori angene ngembobo yenaliti kwiTop 8.
Izolo ebusuku iSuperSperSport ibibhekene neMamelodi Sundowns emdlalweni we-Absa Premiership eLoftus Stadium, ePitoli. Emdlalweni olandelayo izobhekana naMaZulu eKing Zwelithini Stadium, eMlaza, ngo-Ephreli 24.