AmaSUV athandwa ezweni lonke
YINTO eyaziwayo ukuthi izimoto eziphakeme amaSport Utility Vehicle (SUV) ziyintandokazi kubathengi njengoba zithengwa ubuthaphuthaphu.
UMqondisi wakwaTrue Price, uDarryl Jacobson, uthe noma edayiswa esidlangalaleni amaSUV ayintandokazi kubathengi.
“Emhlabeni jikelele amaSUV adayisa ubuthaphuthaphu. Isigaba sawo singezinye zezenza kahle. Sibona kwenzeka into efanayo nanoma edayisa esidlangalaleli lapha eNingizimu Afrika. AmaSUV ayinyama futhi uma esesimeni esihle ayathengwa esidlangalaleni,” kusho uJacobson.
Yena nethimba lakhe bahambela izindawo eziningi lapho kudayiswa khona esidlangalaleni izimoto ezidliwe ngamabhange eGauteng.
Basuke befuna ukuqoqa ulwazi ngendlela izimoto ezidayisa ngayo.
“Sinolwazi oluningi oluthinta izinkulungwane zezimoto ezidayisa esidlangalaleni emishinini yethu. Ukuhlaziywa kwalolu lwazi kuveze imiphumela emangalisayo uma kuziwa kumaSUV nokuthi ungathola malini uma uwadayisa. Sihlanganise uhla lwezimoto ezingu-10 ezihamba phambili olususelwe entengweni ngesikhathi idayisa esidlangalaleni.”
1. Hyundai Creta
Le moto, eyathuthukiswa ngekota yesithathu ka-2018, iyathandeka kubantu. “Ihlale inakwa futhi njengoba izibalo ziveza, idayiswa ngemali enhle,” kusho uJacobson.
Uthe ifika nezinto ezifana netouchscreen infotainment system neBluetooth. 2. Mazda CX-3 IMazda CX-3, ethuthukisiwe ngoJulayi nyakenye, yiSUV encane enhle. “Ihamba kamanndi futhi ithule, kumnandi ukuyishayela, inhle futhi iyimoto ekahle kowesifazane ongumama. Ngokwami inhle kuneCX-5,” kusho uJacobson.
Uthe ukholwa wukuthi iCX-3 iyisizathu sokuthi iMazda iphumelele eNingizimu Afrika. 3. Toyota Land Cruiser NgokukaJacobson, le moto ihlale iheha esidlangalaleni kunganakwa nokuthi isihambe amakhilomitha amangaki nesimo sayo. “YiSUV bonke abathengi abafisa ukuba nayo. Yi-4x4 yoqobo futhi ekwaziyo ukuhamba obhuqwini. Uma uhlanganisa lokhu nokuthembeka kweToyota unemoto yoqobo.” 4. Toyota Fortuner YiToyota yesibili ukuba sohlwini futhi ukuthola enhle imali uma uyidayisa nokufakazela amandla eToyota. NgokukaJacobson, iFortuner iyathandwa kubathengi bamaSUV ngisho bethenga endala noma entsha.
“Ibe yimoto yesithupha ukuthengwa kakhulu ngoMashi. Uma iFortuner idayisa esidlangalaleni, kuhlale kunabaningi abafuna ukuyithenga.” 5. Volkswagen Tiguan
ITiguan elayisha abagibeli abayisikhombisa yethulwe ngekota yesibili ka-2018 futhi uJacobson uthe lokhu kunyuse udumo lwale SUV eyakhiwe kahle. 6. Toyota RAV4
Le Toyota yesithathu kulolu hla yenza abantu bakhuluma ngesikhathi ifika ngo-1994. “Yayinto ehluke kakhulu. Sonke sahlala sayibuka.” Udumo lwayo alukaze lwehle kusuka lapho. Uthe lokhu kufakazelwa wukuthi kudayiswe angu-715 ngenyanga eyedlule. Entsha isanda kuthulwa futhi uJacobson uqagela ukuthi nayo izodayiseka ngemali enhle. 7. Hyundai Tucson
Le Hyundai yesibili kulolu hla yangena esikhaleni se-ix35 ngoMashi ka-2016. UJacobson uthe iTuscon yokuqala yethulwa ngo-2005 futhi yaba yintandokazi njengoba kwadayiswa angu-22 716 eNingizimu Afrika kusuka ngo-2005 kuya ku-2010. Yabe isishintshwa yi-ix35 okwadayiswa angu-33 692 ngaphambi kokuthi iHyundai ibuyele egameni leTucson. 8. Mercedes-Benz GL Engena endaweni yesishiyagalombili yiGL ehlanganisa iGLA, GLC, GLE neGLS. Uthe ithandwa ngabathengi ngenxa yokuthi iyabukeka, ihamba kahle, ubuchwepheshe nokuba seqophelweni lengaphakathi lazo. 9. Ford EcoSport
Incane, ibukeka kahle, ibiza kahle, iFord EcoSport ithandwa ngabathengi abayithenga iyintsha noma iyisekeni eNingizimu Afrika.
“Ibe yimoto yesikhombisa ngokuthandwa eNingizimu Afrika ngenyanga edlule njengoba kudayiswe angu-868.” Uthe ukwethulwa kwebiza kancane i-1.5 Ti-VCT Ambiente kuzonyusa udumo lwayo. 10. Jeep Wrangler
UJacobson uthe iWranger iyakwazi ukuhamba obhuqwini kodwa entsha ihamba kahle nasemgwaqeni futhi ingaphakathi balenze kahle futhi ithule.