Kushone owokufika kushiswa esitolo elele
KUSOLWA udlame olubhekiswe kwabokufika ngokubulawa kowaseEthiopia, oshiswe esitolo abedayisa kuso elele entathakusa yayizolo eLovu.
Kuthiwa uMnuz Alex Moola (24), ukhale waze wathula ngesikhathi kusha ikhonteyina abelele kuyo ngezithuba zehora lokuqala entathakusa. Ikhonteyina abedayisa kuyo isegcekeni likaMnuz Mzwakhe Mwandla, othe umufi ubeqale ukudayisa ngoJanuwari nonyaka.
UMwandla okhanda izimoto kuyona le ndawo, uthe akukho akusolayo ngalesi sehlakalo ngaphandle kodlame olubhekiswe kwabokufika. Uthe useyasaba nokuqashisa abokufika ngoba akasazi isizathu sokuhlaselwa kukaMoola.
“Sekunesikhathi eside edayisa esitolo u-Alex futhi nomphakathi ubuthenga kuyena ungenankinga. Ubelala kuyo ikhonteyina ngoba uyaphuza ukuvala ebusuku. Abamhlaselile abathathanga lutho esitolo, okukhomba kona ukuthi bebehlose ukubulala yena,” kuchaza uMwandla.
Uthe bezwe kukhala umuntu entathakusa, walunguza ngefasitela wabona kusha esitolo.
“Ngiphumile ngabona amadoda ayisithupha, sekuvele kusha esitolo. Ngiwabuze ukuthi aphumaphi athi abezosiza njengoba kusha. Ngiqaphele ukuthi omunye wawo ubephethe isigubhu esinophethroli oyisiceke, omunye ephethe isibhamu. Baqhamuke emuva kwekhonteyina, bagibela kwenye imoto ebipake buqama,” kuchaza uMwandla. Kuthiwa kushayelwe ucingo umfowabo kamufi naye onesitolo khona eLovu. Kube sekugqekezwa ikhonteyina uMoola watholakala ngasemnyango engashile futhi esaphefumula. Kusolwa ukuthi uhilwe yintuthu njengoba ebengashile emzimbeni.
UMwandla uthe babize i-ambulensi, umufi washona besazama ukumyisa esibhedlela.
Kuthiwa abezimo eziphuthumayo abebehamba nge-ambulensi bakuqinisekisile ukuthi useshonile, kwabizwa amaphoyisa nezicishamlilo.
Umfowabo kamufi, uMnuz Zidan Omar, uthe usathukile ngoba akasazi isizathu sokuhlaselwa komfowabo.
Izolo ubevulile kwesakhe isitolo kodwa wathi useyasaba ukulala ngaphakathi.
“Bengingafuni ukuvula esitolo namuhla (izolo) kodwa omakhelwane bakhalile befuna ukuthenga. Ibuhlungu inhliziyo yami ngoba akukho okubi okwenziwe u-Alex. Sonke siyazizamela njengoba sidayisa,” kusho u-Omar.
Uthe bahlela ukuthi bahambise isidumbu sikamufi e-Ethiopia kusasa futhi naye uyafisa ukuya emngcwabeni. Ukhale ngokuthi umufi ubesemncane, akasiqedanga nesikole ngenxa yokuhlupheka kwelakubo.
Okhulumela amaphoyisa esifundazweni, uCaptain Nqobile Gwala, uthe: “Amaphoyisa afike ikhonteyina isha kukhona owesilisa evaleleke ngaphakathi.
“Kubizwe izicishamlilo, kwagqekezwa ikhonteyina kodwa umlisa obengaphakathi ushonile. Kuvulwe icala lokubulala eliphenywa KwaMakhutha,” kusho uCaptain Gwala.