Bakhombise ubudoda babo bemashela isihlava
ASHIYE umsebenzi amashela ukuhlukunyezwa kwabesifazane nezingane amadoda asebenza kuMasipala weTheku izolo aze athi azoqhubeka nokulwa nalesi sihlava.
Amadoda asebenza ezinhlakeni ezehlukene kumasipala abehambisana neMenenja yeTheku uMnuz Sipho Nzuza. UNzuza uthe baqoke ukungena emgwaqweni bakhombise ukuthi abahambisani nokuhlukunyezwa kwabesifazane nezingane. Uthe bafuna ukudlulisa umyalezo wokuthi isizwe ngeke sibe yilutho ngaphandle kwabesifazane yingakho kumele bavikelwe.
“Sifuna ukutshela amanye amadoda ukuthi ukuba namandla nokuba yindoda akukhonjiswa ngokuhlukumeza abesifazane nezingane. Laba bantu bayigugu lesizwe, ngeke sibe yilutho ngaphandle kwabo,” kusho uNzuza.
Uthe ngeke kugcine ngale mashi kodwa banezinye izinhlelo zokukhuthaza abesilisa ukuthi bavikele abesifazane. Uveze ukuthi kunethimba labaphathi elizoqhubeka nezinhlelo zinyanga zonke ukukhuthaza ukulwa nokuhlukunyezwa kwabesifazane.
UMnuz Siyanda Mzele, osebenza ophikweni lwezindaba zabasebenzi, uthe uthintekile ngezigameko zokubulawa kwabesifazane. Uthe ubone kufanele naye asukume njengendoda akhuze abenzi bobubi. UMzele uthe bazowudlulisa umyalezo wokulwa nokuhlukunyezwa kwabesifazane kuzo zonke izindawo abahlangana kuzo namanye amadoda.
Kwezinye izingqwembe ebeziphethwe kule mashi kukhona nobelubhalwe ukuthi ‘Ukushweba Is Part of Life.’ UMnuz Thabani Zungu, obephethe lolu qwembe, uthe ufundisa abanye abesilisa ukuthi ukushweba uma ushela entombini noma ukwaliwa akusho ukuthi sekumele uyibambe ngenkani.
“Kade sasishweba futhi akekho owesilisa ongathi akaze ashwebe. Amadoda kumele amukele uma owesifazane enqaba adlulele phambili,” kuchaza yena.
UNzuza nabanye ozakwabo kumasipala basayine ebhukwini lokuzibophezela ekulweni nokuhlukunyezwa kwabesifazane nezingane. Imashi iqale ngaseWorkshop eThekwini yaphelela eCity Hall.