Usezikiti uthisha (51) ‘okhiphise umfundi (13) isisu’
UZOBUYELA ngoMsombululo enkantolo yaseMelmoth uthisha (51) okuthiwa wakhulelisa umfundi (13) ka-Grade 8 wabe esemphuzisa amaphilisi okukhipha isisu engazi.
Uthisha ofundisa kwesinye isikole eMkhindini, kuthiwa walutha ingane ukuthi ikholwe wukuthi bayathandana kusukela ngo-Febhuwari. Ngenxa yalokhu ubede eya ocansini nomfundi.
Ekuqaleni kwenyanga umfundi ukhale ngezinhlungu ayezizwa esiswini kanti usezithwele. Ube esebikela uthisha ngobuhlungu ayebuzwa.
Uthisha wabe esemnika amaphilisi ethi azothiba izinhlungu ayezizwa.
Umfundi kuthiwa ube esegula kakhulu waphuthunyiswa esibhedlela, kwatholakala ukuthi amaphilisi awaphuzile kwakungawokukhipha isisu.
Uyise womfundi uthe ufuna uthisha angadedelwa ngebheyili futhi athole isigwebo esinzima ngakwenzile.
“Kumanje ngikhuluma nawe ngishaqekile ngoba bengingalindele ukuthi umuntu omdala kangaka owuthisha angenza into efana nalena. Besingazi ukuthi ingane ikhulelwe, mina bebengifihlele. Ngithole sekwenzeke ngoba esegula ukuthi ubenezinyanga ezimbili ezithwele. Esikufunayo siwumndeni wukuthi njengoba kuzoyiwa enkantolo ngoMsombuluko angayitholi ibheyili futhi agcinwe ejezile ngento ayenzile.”
Uthe yize ingane yakhe iphazamisekile ngenxa yalokhu okuyivelele kodwa iyaqhubeka nesikole.
Okhulumela amaphoyisa KwaZulu-Natal, uCaptain Nqobile Gwala, uthe uthisha uboshwe ngoSepthemba 13 wavela enkantolo ngoMsombuluko.
“Umsolwa uvele enkantolo yaseMelmoth ngecala lokudlwengula umfundi oneminyaka engu-13 wesikole abesebenza kuso nelinye lokuzama ukubulala. Icala lihlehliselwe uSepthemba 23 ukuze afake isicelo sebheyili. Usagcinwe esitokisini,” kusho uCaptain Gwala.
Icala liphenywa wuphiko laseShowe oluphenya amacala athinta udlame lomndeni, awokuvikelwa kwezingane
nawocansi.