Qaphela indlela ochitha ngayo imali, uzakhele umnotho

SIKHULA NGOMNOTHO

NGABE uzizwa kanjani uma uchitha imali? Kuyakujabulisa ukuthenga okuthandayo noma uzwa ubuhlungu ngokuhlukana nemali?

Ubudlelwane babantu nemali abufani, abanye bayakujabulela ukuthenga kanti abanye bathanda ukuhlala benayo beyibuka.

Olunye uhlangothi lwezifundo zomnotho lugcizelela ukuthi imali ayifani ngoba indlela esiyiphatha ngayo ayifani. Bathi imali esiyithole kalula siyichitha kalula kunesiyisebenzele kanzima.

Siphinde futhi siyichithe ngokunganaki uma imali iseningi kuthi uma isiphela siqale ukucophelela.

Lesi esinye sezizathu ezenza iholo liphelele ezandleni ngokushesha. Uma uqaphelisisa uyabona ukuthi ngezinsuku zokuqala ukhokhelwe imali iphuma ngokushesha bese kuyancipha ngokwehla kwayo.

Obunye ubufakazi obuqanda ikhanda yindlela esichitha ngayo imali yebhonasi. Isikhathi sokubhonasa sihlezi sisibheke ngamehlo abomvu size senze izikweletu sithembisa ngebhonasi. Ngandledlana thize sizithola sinegunya lokuyichitha ngendlela esiyithandayo le mali ngoba sizizwa sicebile okwesikhashana. Imvamisa ukhumbula isiyophela imali ukuthi kunezinto ezibalulekile obekufanele uzenze. Kwenziwa yini ukuthi ukhohlwe?

Okokuqala nje kumnandi ukuthola izinto obuzifisa kodwa ungakwazi ukuzikhokhela. Kumnandi ukuthi uzizwe njengomuntu onothile ongenazingqinamba zemali.Lapho uphaphama khona akusekho lutho usukhala ezimathonsi.

Konke lokhu kuncike ebudlelwaneni obakhayo phakathi kwakho nemali. Imikhuba emihle yokuphatha imali ayiqhamuki ngoba usunemali eningi. Uma ungazange uzifundise izindlela eziphusile zokuphatha imali yakho ngeke kuzenzakalele ngoba usuthole isamba semali.

Yingakho kubalulekile ukuzifundisa ukuhlela indlela oyisebenzisa ngayo imali ngesabelo-mali. Okumqoka ukwazi ukuthi isabelo-mali akulona nje iphepha leli obhale kulona kepha yilokho okukubusayo emqondweni. Ungaqala nje ngokubhala ukuthi imali yakho iya kuphi kodwa ngokuhamba kwesikhathi kumele kube semqondweni ukuthi uyichitha kanjani. Lokhu kukusiza ngokuthi ubone ngokusobala ukuthi imali yakho iyaphi. Uma usubonile kulandela ukuthi wenze izinqumo ezinqala ngokuthi kufanele kwenzekeni ngemali yakho.

Igxathu lokuqala wukuthi ukwenze kube yisibopho ukuthi kube nemali oyibekayo noyitshalayo njalo uma uthola imali.

Kufanele lesi sibopho sime njalo kunoma iyiphi imali engenayo ngisho naleyo oyithola ungayilindele.Isigaba esilandelayo ukukhokha izikweletu ngenhloso yokuhlukana nazo. Yenza kube umkhuba ukukhokha ngaphezulu kwemali enqunyiwe ukuze ulwe nenzalo yesikweletu.Qala ngokukhokha kakhulu kulezo zikweletu ezinenzalo enkulu ukuze usheshe uhlukane nazo futhi unciphise inzalo.

Zifundise ukuthenga noma ukhokhe ngesaphulelo futhi ukhokhe ukheshi. Uma ingekho imali ngaleso sikhathi qala ngokuyibeka ukuze ugweme ukuthenga ngesikweletu.

Izitolo zikuheha ngokuthi ungathatha izimpahla ukhokhe ngenyanga kungabikho nzalo ngezinyanga eziyisithupha zokuqala.

Namabhange akutshela ukuthi i-credit card ayinanzalo uma ukhokha emuva kwezinsuku eziwu-30. Abangakutsheli khona ukuthi umkhuba wokuthenga manje ukhokhe emuva kwesikhathi ukwenza uthenge kakhulu kunoma usuke ukhipha imali. Kuvamile futhi ukuthi abantu bangakhokhi ngalesikhathi esinqunyiwe esingenanzalo.

Lokhu kwenza uthenge kakhulu kunesidingo uphinde ukhokhe inzalo obungeke uyikhokhe uma uthenga ngokheshi.

Ngisho wona amakhadi asebhange akukhuthaza ukuthi uthenge kakhulu ngoba awuyiboni imali uma iphuma. Ekugcineni kukuwena ukuthi uzizwa kanjani ngemali yakho. Uma kukujabulisa ukuyichitha lindela ukuthi iseyinde kakhulu indlela yakho yokwakha umnotho.

Sishayele noma uthumele umlayezo ku-083 354 8794. Bhalisa uthole ulwazi olunohlonze ku www. ubuntuwealth.co.za

Hheshe!