Zikubhincisela nxanye ezakwaMshengu
UNTOBE Mtshare noPinky Mabaso baqale ukwaziwa sebegidela iqembu likaSbongiseni Shabalala weLadysmith Black Mambazo noMaqhinga Hadebe, iShabalala Rhythm. Lezi zintokazi zibe sezisebenza nabaculi abaningi okubalwa kubo uGlama Kamaskandi, AmaYellowbone, Ithwasa Lekhansela nabanye.
Seziwuzungezile umhlaba ngenxa yekhono lokucula nokugida ingoma.
Njengamanje sezineqembu lazo, EzakwaMshengu. UCHARLES KHUZWAYO ukhulume nabo bobabili uNtobe noPinky.
CHARLES (CK): Ake nizichaze ukuthi ningobani?
NTOBE (NM): Mina nginguNontobeko Banothile Mtshare waKwaXimba eMkhambathini.
Ngiyinkosazane kaMasiki Moses Mtshare noMavise Mtshare. Ngiphothule uGrade 12 eMdepha High.
PINKY (PM): Mina nginguPinky Precious Nokubonga Mabaso. Nginguthunjana ezinganeni ezingu-10 zikaKupu noBusani Mabaso baseMagangangozi, eBergville. Ngigcine kuGrade 11 eMamponjwane Combined School.
CK: Nisakhula nanizimisele ngokufundela miphi imisebenzi? NM: Ukuba wumhlengikazi. PM: Ukuba yiphoyisa. CK: Ningene kanjani emculweni?
NM: Ngabona ngekhono enganginalo kusukela ngisafunda. PM: Yikhono CK: Asemangaki amaalbhamu eseniwaqophile? NM: Iseyodwa. CK: Sithini isihloko sayo? PM: Sithi Uyembelinye. CK: Ngaphandle komculi, nenzani enye?
NM: Ngilingisa emidlalweni yasesteji.
CK: Yiluphi olunye uhlobo lomculo olukhonzile? NM: Umculo wokholo. PM: YiReggae. CK: Yibaphi abaculi enisafuna ukuqopha nabo? NM: Ithwasa Lekhansela CK: Nikhonze kuphi ukudla? NM: Inkukhu yaseNando’s. PM: Amaveji. CK: Uma ningekho matasatasa nomculo, nisichitha ngani isizungu?
NM: Ngibuka iTV noma ngiye ejimini. PM: Ngizibukela iTV. CK: Yiliphi izwe enisafuna ukuyongcebeleka kulo? NM: E-Dubai. PM: Nami iseDubai. CK: Nishadile? NM: Cha angishadile. PM: Cha. CK: Ngamadoda anjani enifuna ukushada nawo?
NM: Ngumuntu oneqiniso nonothando.
PM: Onothando, iqiniso nesineke.
CK: Sesiphetha, yini eyake yanehlela eningasoze nayikhohlwa?
PM: Ukushiywa emhlabeni ngubaba nabafowethu.