Ucwaningo ngobaba abasebancane
UKWANDA kobaba abasebancane kwandisa izingane ezikhula ngaphandle koyise njengoba sekunetemu elidumile lo-Absent Fathers.
Lokhu kuvele ocwaningweni olwenziwe uNksz Nokwanele Noxolo Mhlongo (24), othweswe iziqu zeMasters in Population Studies enyuvesi yaKwaZulu-Natal ngeledlule.
Ucwaningo ulwenze kobaba abangu-15 abaneminyaka ephakathi kuka-18 no-24.
Yize ethole ukuthi iningi labo lifuna ukuba ngobaba ezinganeni zabo, iminyaka yabo ingenye yezinselelo ezenza ukuthi bangakwazi ukwenza lokhu.
“Ngithole ukuthi akubona bonke obaba abenza ngamabomu ukuthi bangabi khona empilweni yezingane zabo. Engikhulume nabo bathi kwesinye isikhathi abalitholi ithuba lokusondelana nezingane zabo ngoba nabo basengaphansi kwesandla sabazali. Omunye ungitshele ukuthi nguyise owahlawula ingane waphinde wayondla, okwenze yena wangaba nayo indawo enganeni yakhe,” kusho uNksz Mhlongo.
UNksz Mhlongo uthole nokuthi nokungasebenzi kunomthelela ekutheni obaba baqhelelane nezingane zabo.
Bathe uma bengakwazi ukondla bayanqatshelwa ukusondelena nezingane zabo.
“Ngithole ukuthi isiko lokuhlawula nalo linomthelela. Kunemizi engamniki indawo yakhe ubaba ongahlawulile ngisho ngabe uyafisa ukusondelana nengane. Labo baba bathe bayafisa ukuba ngcono yingakho nabantu abadala kumele bakuqonde ukuthi kumele bavunyelwe ukukhulisa izingane zabo ngisho bengenayo imali,” kusho uNksz Mhlongo.
Yize ekhule enabazali uNksz Mhlongo, uthe bekumkhathaza ukuthi bonke abangani bakhe bebenobaba abaphilayo kodwa bengakhuliswa yibona.
Yilokhu okwenza abe nogqozi lokwenza lolu cwaningo.
UMnuz Dalisu Mbatha oyiPsychologist, uthe ukungabi khona kobaba empilweni yezingane zabo kunomthelela ekwandeni kwabesilisa abahlukumezayo.
Uthe ukuba sempilweni yengane akudingi imali kuphela kodwa kumele ubaba abe seduze nangokomoya.
“Ngokwemvelo yowesilisa uzibona engeyena ubaba ophelele uma engenayo imali. Lokhu kwenza ukuthi angakwazi ukondla ancamele ukungasondelani nengane yakhe. Nokho ingane kwesinye isikhathi idinga ubuso bomzali hhayi imali yakhe. Izingane zabafana ikakhulukazi ziyadinga ukuba nobaba oyisibonelo ukuze zikhule zibe qotho,” kusho uMbatha.
Izibalo zocwaningo lweStatistics SA zangonyaka odlule zaveza ukuthi zingu-57% izingane ezingaphansi kweminyaka engu-15 ezikhula ngaphandle koyise.