Ukugxekwa abalandeli akumcasuli uGabuza
UMGADLI weSuperSport United obonakala ezelwe kabusha phambi kwamagoli, uThamsanqa Gabuza, uthi ukugxekwa ngabalandeli kuyingxenye kanobhutshuzwayo yingakho ekwamukela.
UGabuza ufike kwi-United wakhombisa ukuzinza selokhu kuqale isizini. Useshayele leli qembu lasePitoli amagoli amane kule sizini. Unamathathu kwiMTN 8 nelilodwa kwi-Absa Premiership.
Ungomunye wabazobe bebhekiwe nozakwabo uBradley Grobler ukuthi basize Amatsatsantsa a Pitori uma esethuthana nomakhelwane iMamelodi Sundowns namuhla.
La maqembu azobe edlala emlenzeni wesibili womdlalo owandulela owamanqamu weMTN 8 eLucas Moripe Stadium ngo7.30 ebusuku. Umlenze wokuqala waphela ngo 1-1, kuyi-United eyayingosokhaya.
UGabuza ushiye i-Orlando Pirates abesehlale kuyona amasizini ayisithupha kanti ubesezakhele isigcwagcwa kwabanye abalandeli abebemgxeka ezinkundleni zokuxhumana ngokugeja, babuye bamhhewule nasemidlalweni.
Esigamekweni sangesizini edlule lo mgadli waphuma enkundleni umdlalo ungakapheli bebhekene neBlack Leopards ngenxa yakho njalo ukuhhewulwa.
Ekhuluma nabezindaba kuleli sonto ngesikhathi belungiselela umdlalo weSundowns, uzwakale njengomuntu osevuthiwe ngokomqondo ukuze akwazi ukumelana nokugxekwa kanjalo nokunconywa.
“Angizange ngingene (ezinkundleni zokuxhumana) kodwa uhlezi ubezwa abantu bekhuluma emigwaqweni lapho ngihamba khona. Abantu bayalithanda kakhulu ibhola. Uma ungenzi kahle kodwa bekwazi ukuthi ungakwazi ukwenza kangcono bazophoxeka vele. Uma wenza kahle ushaya amagoli bazokutshela. Yinto yakhona lena ebholeni. Akuqali manje, ngisho ngisekwiGolden Arrows lezi zinto bezenzeka. Abantu bashiya imindeni yabo, abanye benokhwantalala, bezobuka ibhola ngoba befuna ukuzijabulisa. Ngakho kuwumsebenzi wakho (uma ungumgadli) ukubanika lokhu abakudingayo,” kusho uGabuza.
Uthe akanangcindezi ngoba ufike kwi-United wathola ukwethenjwa ngangakwenzela iqembu.
UGrobler uthe kade amhlonipha uGabuza njengomdlali ophambili.
“Kade ngamhlonipha njengomdlali. Hhayi nje ngasohlangothini lokushaya amagoli kodwa ungumdlali omuhle ekugcineni ibhola futhi uyazimisela. Usinikeza indlela ehlukile yokudlala,” kusho uGrobler.
Lo mgadli osenamagoli ayisithupha kule sizini, amahlanu kwiligi nelilodwa kwiMTN 8, ulindele ukuthi zithengane phakathi kwabo neSundowns.
“Womabili amaqembu alokhu eya ngokuba ngcono kusukela emdlalweni odlule. Ngilendele ukuthi kube wumdlalo oshubile okungeke kugqame iqembu elilodwa,” kusho uGrobler.