IDowns ilobizela ukuwina iMTN 8
ISITOBHA seMamelodi Sundowns, uWayne Arendse, sikholwa wukuthi ukushintsha kohlelo kwiCAF Champions League kubanika ithuba lokuwina iMTN 8 okuyiyona kuphela asebeshoda ngayo eChloorkop ngaphansi kobuholi bomqeqeshi uPitso Mosimane.
ISundowns izokwamukela iSuperSport emdlalweni womlenze wesibili owandulela owamanqamu weMTN 8 ozoba seLucas Moripe Stadium, e-Atteridgeville, namuhla ngo7.30 ebusuku.
Kowomlenze wokuqala, laba bakhaya badlale ngokulingana ngo 1-1 khona eLucas Moripe Stadium. AmaBrazilians agcine ukufinyelela kowamanqamu weMTN 8 ngo-2016, akhala ngaphansi kwiBidvest Wits.
Awakaze ayiwine iMTN 8 ngaphansi kukaMosimane okuyinto eyisilonda enhliziyweni yakhe. Bekujwayeleke ukuthi iMTN 8 idlalwe iSundowns isisesigabeni samaqoqo seChampions League obekwenza ihlale isendleleni. Kulokhu ikhalenda leChampions League lihambisana nele-Absa Premiership.
“I-MTN 8 kade ihlala isifica ngesikhathi esibi. Bekuba wukuthi sisendleleni noma sidlala imidlalo yeCAF. Ngicabanga ukuthi kulokhu akukubi kangako.
“Singabadlali siyayifuna le ndebe ngoba iyona kuphela eshodayo ekhabetheni lethu. Lesi yisikhathi esihle sokufika kowamanqamu siyiphakamise,” kusho u-Arendse.
ISundowns idinga ukungangenelwa yigoli kuphela ukuze iqede ishobolo lokuhlulwa yiMTN 8. Ngakolunye uhlangothi iSuperSport ishaya inethi cishe kuyona yonke imidlalo kule sizini.
Isishaye inethi kawu13 emidlalweni yeMTN 8 neyePremiership ihlangene. Amatsatsantsa aphume enkundleni engalishayanga igoli emdlalweni wokuqala ehlulwa yiSundowns ngo 2-0 kuphela.
Ngempelasonto edlule avalele phakathi amathathu edlala ngokulingana ngo 3-3 neCape Town City.
“Ukuba negoli lasekuhambeni akusibeki ethubeni lokuwina umdlalo ngoba amaqembu angena ensimini efuna ukushaya amagoli. Uma iSuperSport ishaya igoli isiphelile indaba yalethu. Okwamanje igoli lasekuhambeni alisho lutho. Indaba yalo izosebenza uma umdlalo uphela ngo 0-0.
“Siyakwazi okufanele sikwenze. Kufanele siye ngomqondo wokufuna ukushaya amagoli, senze isiqiniseko sokuthi bona abalitholi. Siyazigqaja ngokukwazi ukukwenza lokho emidlalweni yethu.
“Bazozama ngakho konke ukuthola igoli ngokufaka ibhola ebhokisini ngoba amagoli abo aqhamuka lapho. Kufanele sibhekane nalezo zimo. Kuzosilungela,” kusho u-Arendse.
Ngemuva komdlalo wanamuhla iSundowns izobhekana neMaritburg United emdlalweni wePremiership eLucas Moripe Stadium, ngoMgqibelo ngo-6 ntambama.