UVukusic uyena osezocija Usuthu
KUVELA ukuthi uJozef Vukusic uzomenyezelwa njengomqeqeshi waMaZulu lingakapheli isonto esikulona.
Usuthu luxoshe uCavin Johnson ngoMsombuluko, kulandela ukugqoza kwemiphumela kuleli qembu. AmaZulu awakanqobi nowodwa umdlalo kwemihlanu asayidlalile futhi nebhola abelidlala belingagculisi. Kumanje ayibambe emsileni kwi-log ye-Absa Premiership ngamaphuzu amabili. Ngokuthola kwaleli phephandaba bese kunesikhashana vele abaphathi boSuthu bexoxa nalo mqeqeshi odabuka eSlovakia. UVukusic ugile izimanga kwiPolokwane City ngesizini edlule eyifaka kwiTop 8.
Ngaphandle kwalokho, iRise and Shine bekulukhuni satshe ukuyishaya kangangoba namaqembu athathwa njengamakhulu abebuya elambatha eLimpopo.
“Iqembu selivumelene noVukusic ukuthi athathe izintambo. Abaphathi bafuna ukuthi kuqambe kushaya isonto elizayo, njengoba bezodlala neKaizer Chiefs, okungenani umqeqeshi ebe esebambe izinsuku ezimbalwa ejimini, esebone nabadlali. Empeleni osekushoda kuVukusic ukuthi athole amaphepha amgunyaza ukuthi asebenze kuleli. Izisebenzi zoSuthu zibhizi nalokho njengamanje,” kusho umthombo.
UJohnson ushiye kungasekuhle kuMaZulu njengoba kukhona abebemsola ngokuba nguxovizwe ezikhulwini nakubadlali.
Emuva kokushiya kuMaZulu emithonjeni ehlukene yabezindaba uJohnson ubezwakala sengathi uboshelwe amanqina enyathi ukuze axoshwe.
Bekukhona nokuthi ufisa ukuzwelwa ngokumehlele kuleli qembu, nobekuzwakala sengathi usola impatho yabaphathi ukuthi ibingeyinhle. Ezinye izinto asolwa ngazo uJohnson wukuthi waphoqa izinkakha zebhola uSiyabonga “Bhele” Nomvethe noMabhudi “Bhubesi” Khenyeza ukuba bathathe umhlalaphansi ebholeni.
UBrilliant Mkhathini okhulumela AmaZulu akayivumanga futhi akayiphikanga ekaVukusic.
“Sizomemezela umqeqeshi wethu omusha maduzane lingakapheli isonto. Ngaphandle kwalokho akukho okunye engingakusho okubambekayo ngaphandle kokuthi silinde isimemezelo esisemthethweni seqembu,” kuphendula uMkhathini.