Ikhwelo likaStick konompempe ngokuthi imithetho mayifane
UKHOMBISE izimpawu zokuvuthwa ekuqeqesheni umlolongi wabadlali basemuva bamaBhokobhoko, uMzwandile Stick, ngesikhathi ephonsela inselelo unondweba uJerome Garaces ozobe edlalisa kolindwe umhlaba wonke wokususa iNdebe yoMhlaba neNew Zealand ngoMgqibelo eYokohama, eTokyo, eJapan.
NgokukaStick, amaBhokobhoko awakaze awulungele ngale ndlela umqhudelwano. Ngaphezulu kwalokhu, kumenza angabe esakwazi ukulinda ukukhumbula ukuthi lo mqhudelwano oqala ngoLwesihlanu, iqembu lakhe liwuzibula nezimbangi ezinkulu ama-All Blacks.
Iwona ama-All Blacks avikela isicoco kodwa ukulinyalelwa abadlali abamqoka nokuwaphonsa ethala amakhokho kwabanye, kwenza leli qembu lifane namanye ngokwamathuba okudla isicoco okuyinto engafani nasemihleni.
Kuyinto efana nesiko embhoxweni womhlaba ukuthi amazwe akleliswe aba phezulu emhlabeni aphathwe ngendlela ehlukile kunalawa asuke ekleliswe ngasemuva.
Kulokhu amazwe afana nayo iNew Zealand, Wales ne-England azophathwa kangconywana kulo mqhudelwano uma lo mkhuba okhuzwa uStick uzoqhubeka naseJapan.
“Okungaba yisibusiso kithina ukwazi ukuthi sizihlulelwe ngoba singakwenzanga ngendlela ebesikuhlelile kunokuthi sishaywe ngenxa yesinqumo sikanondweba esingacacile. Ngihlaba ikhwelo konondweba bonke kuqala ngalo ozobe esidlalisa ukuthi imithetho ifane kuwona wonke amazwe,” usho kanje uStick wodumo kumaSevens.
Ngemuva kokushaywa, ukudlala ngokulingana nokushaywa kwamaBhokobhoko ngesikhathi ebhekene neNew Zealand emidlalweni emithathu edlule, kwenza uStick abone lo mdlalo ungaba omunye okuyohlale kukhulunywa ngawo emlandweni. Okunye okusemqoka ngalo mdlalo ukuthi kuwona wonke amazwe aseke adla isicoco somhlaba, kuyaqapheleka ukuthi asuke engayazi induku kusukela kweyamaqoqo kuze kube sekugcineni.