UMdweshu uvuma ukuthi igazi elakhe
USERGEANT Bhekukwazi Mdweshu uvumile eNkantolo eNkulu yaseMgungundlovu, ethetha icala lokufa kwabantu eGlebelands, ukuthi igazi elatholakala endaweni okwakuzanywa ukubulalela umuntu kuyo ngo-Agasti 19, 2014 ngelakhe.
Lokhu kwenzeke emuva kokuthi uphiko okade luhlola igazi lufike enkantolo lilethe umphumela wocwaningo.
Ufakazi wophiko akazange agibele ebhokisini kodwa umphumela wophenyo lwabo ufundelwe yinkantolo waveza ukuthi ngempela igazi elatholakala esigujini samafutha ngelikaMdweshu.
Akazange agibele ebhokisini ngoba bekukhona omunye ufakazi ongeke adalulwe ongena ngaphansi kohlelo lweBig Four.
UMdweshu ufundeliwe umphumela wokuhlolwa kwegazi, wavuma ukuthi yebo ngelakhe. Nommeli wakhe u-Adv Martin Krog ushilo ukuthi uMdweshu akaphikisani nalo mphumela.
Kodwa phambilini uKrog watshela inkantolo ukuthi uMdweshu walimala esehlakalweni sokudunwa kwemoto.
UKrog izolo uqhubekile nokuhlohla imibuzo lofakazi ongeke adalulwe mayelana nokukubulawa kukaMnuz Sinyiko Ncayiyana nokuhlaselwa kwakuBlock R ngo-Agasti 19, 2014.
Omunye ummeli wabanye abamangalelwa, u-Adv Xolani Sindane ubuze ngokubulawa kukaNcayiyana nokuhlaselwa kwe-Block R.
USindane utshele lo fakazi ukuthi lona amumele ummangalelwa wesithathu uMnuz Vukani Mcobothi wayesendlini yakhe e-block 52, ngesikhathi kubulawa uNcayiyana.
Ufakazi uthe lokho kungamanga ngoba yena wambona uMcombothi nabanye abathathu begijima ngemuva kokuqhuma kwesibhamu.
Uqhubekile watshela inkantolo ukuthi uMcobothi waze wakhuluma naye ngemuva kwendaba.
USindane uthe uMcobothi uzotshela inkantolo ukuthi yena waphuma njengabanye abantu waya endaweni yesehlo ngoba efuna ukubona ukuthi ngubani obulewe. Ufakazi uthe ngamanga lawo.
Ufakazi uthe naye waya endaweni yesigameko. USindane uthe uMcobothi umtshele ukuthi akulula ukuthi ufakazi angakwazi ukubona abantu abagijima endleleni ebusuku ngoba ehostela ngo2014, kwakungakhanyi.