Zicishe zashisa unogada izitshudeni zase-DUT
KUBOSHWE izitshudeni eziyisishiyagalolunye zaseDUT ezisolwa ngokuthela unogada ngophethroli izolo.
Kuthiwa zishaye unogada (27) zamthela ngophethroli zizama ukumshisa zaphinde zacekela phansi nengqalasizinda zibhikisha ophikweni iSteve Biko.
UBrigadier Jay Naicker, okhulumela amaphoyisa kulesi sifundazwe, uthe ngokuthola kwamaphoyisa iqulu lezitshudeni belimasha emgwaqweni uSteve Biko ekuseni laqhubekela egumbini eligcina izimpahla lalicekela phansi ladlulela emagumbini ahlala onogada lapho kusolwa ukuthi lifice unogada lamthela ngophethroli.
Kwenzeka lokhu nje isikhungo bekumele sivulwe izolo kulandela ukuvalwa kwaso izinsuku ezintathu ngenxa yemibhikisho yezitshudeni zithi zifuna inyuvesi iveze ukuthi zithini izinhlelo zayo zokuphepha kulandela ukuhlaselwa kukaSandile Ndlovu osesimeni esibucayi esibhedlela.
Izitshudeni zithi isikhungo asiphephile zifuna ikhishwe nenkampani yonogada esebenza kusona.
UNaicker uthe izitshudeni eziboshiwe zineminyaka ephakathi kuka-20 no-30 kanti kulindeleke ukuthi zivele enkantolo maduze.
Ibuzwa ngalesi sigameko inyuvesi iphendule ngesitatimende yathi ikhathazekile ngokusatshiswa kwezitshudeni nabasebenzi yathi inyuvesi iyasigxeka lesi senzo sobugebengu esibandakanya ukusetshenziswa kwamabhomu kaphethroli.
“Inyuvesi iyazi ukuthi abasolwa kulobu bugebengu baboshwe ngamaphoyisa. Sizwile ukuthi ngaphandle kokucekela phansi ingqalasizinda edingeka kangaka kusolwa ukuthi kuphinde kwaba nemizamo yokushisa unogada ngophethroli.
“Okwamanje isikhungo sisabheka ukuthi ungakanani umonakalo odalekile.”
Siqhubeka sithi: “Isigungu sezitshudeni siyasinxusa ukuthi uma kubhikishwa akulandelwe imigomo, kuhlonishwe izitshudeni ezifisa ukufunda zingasatshiswa, kungaphazanyiswa ukusebenza kwenyuvesi. Siyinyuvesi sizibophezele ekutheni isikhungo sibe yindawo ephephile elungele ukufunda nokufundisa ikakhulukazi ngalesi sikhathi esibalulekile sokufunda.”
Umengameli wesigungu sezitshudeni, uThamsanqa Memela, ubengatholakali ocingweni lwakhe imiyalezo athunyelelwe yona akayiphendulanga.