Kuqediwe ukujezisa izingane ngenduku
ABEZINHLANGANO ezilwela amalungelo ezingane basishayela ihlombe isinqumo seNkantolo yezoMthethosisekelo esivuna esasithathwe yiNkantolo eNkulu eGauteng esithi kuphambene nomtho ukuthi abazali bashaye izingane emakhaya.
Isinqumo esikhishwe izolo sikubeka ngokusobala ukuthi ukushaywa kwezingane osekujwayelekile emakhaya ahlukene, akukho emthethweni.
Inkantolo ithe zikhona ezinye izindlela zokukhuthaza imfundiso yokulalela ezinganeni ngaphandle kokuzishaya.
Lesi sinqumo sasikhishwe yiNkantolo eNkulu yaseGauteng ngo-2017 ngemuva kokuba uyise wengane eneminyaka engu-13 watholakala enecala lokuyishaya emuva emuva kokuyibamba izithokozisa ngezithombe zocansi. Inkantolo yathi akukho emthethweni, kuphula amalungelo ezingane.
Inkantolo yaveza nokuthi ukushaywa kwezingane kuholela ekunyukeni kwesibalo sokuhlukunyezwa kwezingane kuleli.
IFreedom of Religion South Africa (Forsa) ibingahambisani nalesi sinqumo senkantolo, ithi kunomehluko phakathi kokuhlukunyezwa kwezingane nokushaywa kwazo ngoba zifakwa endleleni efanele. Kodwa uhulumeni nezinhlaka zomphakathi bavumelane nesinqumo sokuvala ukushaywa kwezingane.
UMnuz Nkosinathi Dladla, ongumqondisi wezomthetho eMnyangweni wezokuThuthukiswa koMphakathi, uthe izingane kumele zivikelwe odlameni. Isinqumo seNkantolo yezoMthethosisekelo sizovulela iziphathimandla kwezomthetho ukuba ziwuvale umthetho wokushaywa kwezingane ngabazali bazo.
Uma kwenzeka umzali eseshaya ingane yakhe angabhekana necala lokushaya, isigwebo sakhona singafika eminyakeni engu-15, kuya ngobufakazi obulethwa enkantolo.
Owenhlangano iBobby Bear, uNksz Sbo Ngcobo uthe: “Izingane kumele zingashaywa njengoba kungavumelekile kuleli ukuba zishaywe. Ukushaya ingane kugqugquzela udlame. Ingane ikhula yazi ukuthi umuntu owonile noma uma onenkinga uyixazulula ngenduku. Lokho akulona iqiniso ngoba kukhulisa izingane ezinezinkinga eziningi, ezinye kuze kumele ziye kodokoteka bengqondo ukuze zikwazi ukukhohlwa ukuthi zikhuliswe ngokuhlukunyezwa ngenduku. Zikhona ezinye izindlela zokujezisa ingane uma yonile. Umuzi nomuzi unomthetho wayo ngakho umzali angasebenzisa indlela ehambisana naye kodwa ukushaya cha,” kusho uNksz Ngcobo.
UNkk Dumisile Nala we-Childline naye uhambe kulawo mazwi wathi izingane akumele zishaywe ngoba ziyahlukumezeka.
“Ukushaya ingane akulungisi lutho kodwa kwenza omunye umonakalo ,” kusho uNkk Nala.