Kuzofundiswa amadoda ukuziphatha
KUZOQALWA umkhankaso wokuhambela amathaveni, izikole nezinye izindawo emphakathini kufundiswe abantu besilisa ngendlela yokuziphatha. Lokhu kuvezwe nguMengameli wezwe, uMnuz Cyril Ramaphosa, izolo ngesikhathi kunenkulumompikiswano ngodaba lokuhlukunyezwa kwabesifazane ePhalamende.
URamaphosa ukhale ngokunyamalala kwamadokodo, umuntu osuke ebekwe icala lokuhlukumezwa bese ephunyuka.
Ufuna kusheshe kuphasiswe umthetho ozovimba ukuthi ababhekene namacala okubulala abesifazane bangayitholi ibheyili. Uthe kwesinye isikhathi abesifazane bafa bephethe izincwadi zokubavikela ukuthi bangahlukunyezwa.
“Ukulwa nesihlava sokuhlukunyezwa kuzoba nomkhankaso wokuhambela amathaveni, izikole nezindawo zemiphakathi. Bonke omasipala abawu-278 bazovakashelwa kufundiswe ngezindlela zokuzivikela kwabesifazane, nezindlela zokugwema ukuhlukumezeka kwabesifazane,” kusho uRamaphosa.
Uthe umnyango wezobuLungiswa usuvele uyibeke eceleni imali yezinkantolo ezikhethekile ezibekelwe ukubhekana namacala ocansi wodwa.
URamaphosa uthe kumele kuphele ukuthi abesifazane uma beyovula amacala okudlwengulwa, bayiswe le nalena.
“Kumele ukuvulwa kwamacala kusheshe, kube lula. Kumele iziteshi zamaphoyisa zikwenze kube lula ukuthi kuvulwe amacala.”
Uthe ngaphezu kwalokhu abalahlwa ngamacala okudlwengula, kumele bangayitholi ibheyili, noshwele.
URamaphosa uthe uhlangene nabo bonke abaholi bamaqembu ezepolitiki ePhalamende, bavumelana ngazwi linye ukuthi akwamukelekile ukuhlukunyezwa kwabesifazane.
“Wonke amaqembu ezepolitiki azohlangana ukukhuluma ukuthi kumele senze njani ngalesi sihlava esixakile. Sizosebenzisana sonke kule nkinga,” kusho uRamaphosa.
URamaphosa uthe kuyinkinga ukuhlala kwabokufika ngaphandle kwemvume.
Uthe inkinga enkulu idalwa abaqashi abaqasha abokufika ngenhloso yokubaholela imali encane bese abantu bakuleli bengayitholi imisebenzi.
“Akekho umuntu ongeyena owakuleli okumele ahlale lapha ngaphandle kwemvume.”
Uthe wonke umuntu nosomabhizinisi kumele balandele umthetho, nemithetho yezokuqashwa kwabantu. Uthe kuleli ngeke akwamukele ukuthi kucwaswe abanye abantu abavela kwamanye amazwe.
Umholi weDA, uMnuz Mmusi Maimane, uthe inkinga enkulu wukuthi amaphoyisa awenele futhi inkulu imali esetshenziswa ukugcina iziboshwa emajele, kunokuthi kuqiniswe ezokuphepha.
I-EFF ikhale ngokuthi mancane amaveni amaphoyisa emakhaya nasemakolishini.