Umasipala uphika eyohlu lwabazoqoqa udoti
UMASIPALA weTheku usuwuchithile umbiko weDA wokuthi amakhansela asenze uhlu lwabantu abazoqashwa ukuze baqoqe udoti eMlaza.
NgoLwesibili, uNkk Patricia Kopane, oyilungu leDA ePhalamende elibhekelele imisebenzi kahulumeni, uvule icala lenkohlakalo esiteshini samaphoyisa eMlaza ehambisana namakhansela eDA oMnuz Bheka Ntuli noMnuz Sthembiso Ngema.
UNkk Kopane uthe ngo-Agasti iDA yathola inkulumo eqoshiwe kaNkk Nelly Nyanisa eyalela uMnuz Sipho Nzuza oyiMenenja kaMasipala weTheku neNhloko yakwaDurban Solid Waste (DSW) uMnuz Raymond Rampersad ukuthi balalele amakhansela okuyiwona okufanele asho ukuthi wobani okufanele baqashelwe ukuqoqa udoti eMlaza.
Esitatimendeni esithunyelwe kwabezindaba izolo, uMasipala weTheku uthe kungamanga ukuthi sekukhona uhlu lwabantu abazoqashwa ukuthi baqoqe udoti eMlaza.
“Izinsolo zeDA zingamanga futhi zidicilela phansi isithunzi seMenenja kaMasipala weTheku. Esingakuqinisekisa wukuthi umasipala wanquma ukuziqoqela udoti emuva kokuphazamiseka kwezinhlelo zokuqoqwa kwawo eMlaza.
Umasipala wanquma ukuthi kuzovuleka izikhala eziwu-300 zomsebenzi ukuze kuqoqwe kahle udoti eMlaza. Siyakuqinisekisa ukuthi imenenja kamasipala ibinomhlangano namakhansela nomnyango wakwandabazabantu ukuchaza uhlelo lokuqashwa kwabantu. Lezi zinhlelo zizovuleleka, ngeke zibe nokwenzelela. Kulowo mhlangano akukaze kuthiwe ngamakhansela azophatha lolu hlelo,” kusho abakwamasipala esitatimendeni.
Bathe izikhala zomsebenzi zisazokhangiswa ngesikhathi esifanele.
Baphethe ngokuthi uhlelo lokuqashwa kwabantu lubhekelwa wumnyango wakwandabazantu kumasipala, awekho amakhansela angena kulo.