Ududuze kwaHlongwa oweCosatu
UBEFUNA ukuletha umehluko kubantu baseNingizimu Afrika obeyiPhini likaNgqongqoshe wokuMbiwayo uNksz Bavelile Hlongwa.
Lokhu kuvezwe wuMengameli weCosatu, uNkk Zingiswa Losi, obeyoduduza umndeni kaNksz Hlongwa eMbilo izolo.
UNksz Losi uthe ibuhlungu inhliziyo yakhe ngokudlula kukaNksz Hlongwa ngoba ubewumholi ongaziphakamisile obethanda ukusiza abantu.
“Kungenzeka ukuthi siyazibuza ukuthi kungani uNkulunkulu ethathe uBavelile kodwa uTD Jakes uthi uma usezinhlungwini kusuke kunenhloso ethile.
“Asiqondi ukuthi kungani kodwa kufanele samukele okwenzekile. Ngisebenze noBavelile ngesikhathi kulungiselelwa ingqungquthela yaseNasrec. Ngesikhathi esebizwa wuMengameli, engakazi ukuthi uzoba yiPhini likaNgqongqoshe, wathi kufanele singabantu besifazane size namasu okuthuthukisa iNingizimu Afrika ukuze kube nomehluko kubantu. Kwakuyimina, uBavelile noStella Ndabeni-Abrahams,”
Uthe uNksz Hlongwa ubengakuthwele ekhanda ukuba yiPhini likaNgqongqoshe ubezithobile ekwazi ukusiza bonke abantu.
UNksz Losi ubehambisana nePhini lesibili likaMengameli weCosatu, uNkk Louisa Thipe nobuholi beCosatu KwaZulu-Natal.
Udadewabo kaNksz Hlongwa, uNksz Nokuthula Hlongwa, uthe ngesikhathi kuqokwa uNksz Losi, udadewabo wamtshela ukuthi abantu besifazane baya phambili manje futhi yibona abazolungisa okonakele ezweni.
Uthe yize kubuhlungu kodwa ukududuzwa ngabantu baseNingizimu Afrika nabaholi abehlukene kubathoba izinhlungu abazizwayo.
UMnuz Reggie Nkabinde, okhulumela umndeni wakwaHlongwa, uthe namhlanje kuzoba nenkonzo yesikhumbuzo ngo-3 ntambama eCity Hall, eThekwini. Kusasa kuzoba nomlindelo eMbilo lapho bekuhlala khona uNksz Hlongwa.
Inkonzo yomngcwabo uthe izoba seNkosi Albert Luthuli International Convention Centre (ICC) ngo-8 ekuseni.
UNkabinde uthe emuva kwenkonzo kuzohamba umndeni nabaholi abathile uma uNksz Hlongwa eseyobekwa endlini yakhe yokugcina emathuneni aseChesterville.
Izolo uBartle Road, okungumgwaqo okukhona kuwo umuzi wakwaHlongwa, ubuvaliwe njengoba kulungiselewa ukufaka itende kanti bekukhona namaphoyisa.