Kuzofundwa lukhulu kowezamabhizinisi
SEKUMI ngomumo ngombukiso omkhulukazi wamabhizinisi iDurban Business Fair ozoba ngoSepthemba 25 uphele ngoSepthemba 29, eNkosi Albert Luthuli International Convention Centre (ICC).
Indikimba yalo nyaka ithi: A Journey of Innovation, kulokhu iDurban Business Fair izobe igubha iminyaka ewu-21 yasungulwa.
Kuningi okuzokwenzeka okubalwa izithangami zokucobelelana ngolwazi, ukupheka, izimakethe zasemgwaqweni nemibukiso yosomabhizinisi abancane nezinkampani ezinkulu.
Esitatimendeni esithunyelwe kwabezindaba iPhini leMenenja kaMasipala weTheku kwezokuThuthukiswa koMnotho nokuHlela, uMnuz Phillip Sithole, kuzodingidwa ngobuchwepheshe besimanje nomthelela wabo kwezamabhizinisi.
“IDurban Businesss Fair izohlomisa osomabhizinisi ngamakhono ahlukene ngoba kuningi okuzobe kwenziwa njengoba sekukhona i-4th Industrial Revolution. Sizogxila kwezobuchwepheshe besimanje ngoba osomabhizinisi kufanele bangene kubona. Kufanele sihambisane noguquko olwenzeka ezimakethe nasemhlabeni jikelele. Siyabagqugquzela osomabhizinisi ukuthi bahlelele ingomuso yingakho sibamema kwiDurban Business Fair,” kusho uSithole.
Kuzoba kunezithangami zokucobelelana ngolwazi ezizothuthukisa osomabhizinisi besifazane, ezigxile kwezohwebo emhlabeni jikelele, eze-wholesale nezinye.
Kulindelwe osaziwayo abahlukene nosomabhizinisi abadumile.
IDurban Business Fair ihanjelwa ngabantu abawu-30 000 minyaka yonke okukhona nezinkampani zamazwe angaphandle.
Ngesikhathi isungulwa yayinamabhizinisi awu-100 kodwa manje sekukhangisa izinkampani ezingaphezu kuka-600.
Abanezingane nabo behlelelwe kwiDurban Business Fair ngoba zizobhekelelwa.
Kungenwa mahhala, eminye imininingwane itholakala ku-www.dbnbusinessfair.com; ekhasini likaFacebook: @Durban Business Fair; kwelikaTwitter: @DBNBusinessFair bese elikaInstagram: Durban_Business_Fair.