Siyakuncoma ukufakwa kwamavolontiya azolwa nobugebengu
NGOMGQIBELO abaphathi besikole, iZwelibanzi High eMlaza bavuke ngezindaba ezibuhlungu ezithi sekugqekeziwe kwantshontshwa amakhompyutha awu-19, amalaptop ayisihlanu ne-projector.
Uthishomkhulu uthi lokhu kuzophazamisa izivivinyo ze-Information Technology ngoba abazi ukuthi bazowathathaphi amakhompyutha anele ukuze izingane zikwazi ukubhala.
Lesi sikole sinonogada oyedwa osebenza emini, okhokhelwa ngabazali okusho ukuthi ebusuku asigadwa.
Lesi sigameko sisikhumbuza ngenselelo yobugebengu izikole ezibhekene nayo njengoba kokunye kuphuma izidumbu abafundi bebulalana bodwa noma behlasela othisha.
Yingakho nje sisishayela ihlombe isinyathelo sikahulumeni waKwaZulu-Natal sokwethula amavolontiya angu-1 500 ezikoleni, uhlelo olwethulwe ngokusemthethweni ngoLwesibili.
Amavolontiya azolekelela ukuqapha ezikoleni ezikhonjwe njengezinezinga eliphezulu lobugebengu nodlame esifundazweni. Lolu hlelo lwethulwe esikoleni, Ukusa High, esiseHammarsdale.
Kubhekwe ukuthi amavolontiya asize ukwengeza emizamweni yokwehlisa ukusetshenziswa kwezidakamizwa nobugebengu ezikoleni zalesi sifundazwe. UMnyango wezeMfundo usebenzisane nowezokuPhepha nokuXhumana koMphakathi ukuqeqesha amavolontiya. Amanye angu-1 500 azokwethulwa ngonyaka ozayo.
UNgqongqoshe wezeMfundo eKZN, uMnuz Kwazi Mshengu, ugcizelele ukuthi umphakathi kumele usebenzisane namaphoyisa ukubika ukwebiwa kwempahla.
Nathi sithi lena yimpi eyonqotshwa mhlazane umphakathi wayeka ukusebenzisana nezigebengu.
Amavolontiya angu-1 500 mancane uma ubheka inselelo ekhona nobuningi bezikole kodwa kuyisiqalo esikhombisa ukuthi ikhona imizamo eyenziwa nguhulumeni. Kodwa ukuze iphumelele, idinga ukubambisana kwazo zonke izinhlaka, abekho abantu abangavikela izikole ngaphezu kwemiphakathi ezakhele.
Umphakathi waseMlaza awube yisibonelo ngokuthi usize kutholakale amakhompyutha ebiwe eZwelibanzi.